長毛喺大埔嘅議員辦事處開幕，遭到土共維園阿伯送上帶有恐嚇性嘅花圈及棺材等，重寫住「梁國雄議員千古」，即是威脅長毛嘅生命安全！
長毛在維園論壇，曾經大義凜然痛斥維園阿伯劣行，遭對方懷恨在心。議員辦事處開張，今後長毛在明、維園阿伯在暗，劉慧卿、鄭家富、梁耀忠等民主派議員辦事處，曾屢次遭到土共老左暴力襲擊恐嚇，包括掟屎等幼稚嘅劣招。以今時今日長毛遭到嘅妒恨，日後絕對唔排除會遭到暴力攻擊甚至縱火嘅可能，長毛係立法會議員，理應由即日起受警方二十四小時保護，直到長毛認為人身安全無憂為止！
現時中方憎長毛入骨，左派發動宣傳攻勢，將長毛「麻瘋效應化」，即是將長毛無限量妖魔化，搞到長毛好似一個麻瘋病人咁，同時又四處放出謠言，聲稱好多「選民」，表示「後悔選錯」長毛，因為估唔到佢言論咁激，四年後會唔再選佢。又話長毛係泛民主派包袱，話北京遲遲唔邀請六十名議員上京，係因為選咗長毛，二○一二年亦唔會有普選，又係因為港人選咗長毛，話唔定有一日，出兵攻打台灣，都係因為俾長毛激到中央情緒失控，轟炸台北，血洗高雄，叫台灣佬同長毛追究責任喇！
泛民主派有啲人，亦受到咁嘅心戰宣傳影響，喺立法會遠遠見到長毛，就學自由黨咁掩住個鼻運路行！呢啲人，可謂政治低B族，嗱，卿姐就硬淨嘞，佢呼籲一係就一個都不能少，齊齊上京，一係就全體泛民主派陪長毛一齊唔上！
反為三司十一局之中，新紮局長周一鱷一士諤諤，帶頭送花籃致賀，而政制事務局局長林瑞麟，無視親中老左嘅仇恨，重竟然親自到賀，無論係做戲定係真心，一個有高尚情操，一個有獨立人格，喺現時呢個政府之下，都咪話唔屬於稀有動物喎！
當然，周醫生同林局長，亦心知肚明，冇可能會做到特首，所以唔怕蒲頭。下屆特首四大熱門，自然一個都唔見影喎。不過，就算係咁，周一嶽同林局長都算膽生毛嘞，因為共產黨最記仇，就算佢兩個冇得做特首，下屆新人上台，亦難保唔收柯打清佢兩個場，要佢提早退休。所以今次長毛新開張，佢兩個一個送花籃，一個親身到賀，一副豁出去咁嘅樣，可能係對現狀及呢個政府嘅無言抗議，對長毛識英雄重英雄，雪中送炭，難能可貴，長毛喺立法會，日後可以繼續痛斥維園阿伯，對於高官之中嘅一鱷一麟，至緊要口下留少少情喎！
傳真︰2623-9278
電郵︰