上周五內地突然加息，已經打擊投資國企股意欲，點知喺周末，又失驚無神走個拉登出嚟，話要搞恐怖襲擊，令本周二美國總統大選再增變數，真係唔知大市會點走？
經紀陳就堅持家陣氣氛雖然唔好，但仍然係炒股唔炒市，尤其係呢排澳門賭業概念股當道，連帶好多二三線股炒家都雄心壯志，想話做場好戲。
好似上海銘源（233）搞開蛋白芯片一類的生物科技，sell開的故事向來冇乜大變，一直希望可以有策略性股東加入，上月中大市氣氛已經唔多好，但隻股突然平地一聲雷，由0.50元水平急升。上周五再升7.69％至0.70元，成交股數9985萬股，金額6871萬元，單睇陣勢咁勁就知唔講得笑。
經紀陳話，上海銘源突然變得咁掂，聽講係因為有新炒家落場之故，據聞資金係來自祖國，所以甚有大陸炒家嘅豪氣，但隻股短時間內升得咁急，如果家陣先追，則有一定風險。
慕容小初