賓架P請L教授到占美廚房吃午飯，叫左丁山做陪客，當然樂於遵命。L教授乃文章高手，跟佢講幾句說話，都可以吸收文學養份。呢日L教授吩咐我哋讀吓錢鍾書本傑作《圍城》，此書我哋中學時代假扮文藝青年之時，有涉獵過，內容講乜，已經還番晒畀錢大師。L教授話：「此書內容奇特，寫一個心地好，能力較低，唔會做壞事，想做大事又自知無能為力嘅普通人，寫到引人入勝，一讀就手不釋卷。咁普通嘅人物，好難寫㗎，而竟然寫到名滿天下，你哋非睇不可。」
左丁山笑曰：「唔使望咁遠，我就係主角喇，發夢想發達，發唔到，想做老闆，唔敢開舖；想做出版界一位人物，俾人淘汰，俾人笑係敗軍之將，不足言勇，想捐多啲錢做獎學金，荷包又窿丁，但自封好人一個！」賓架P話：「Allofusare.Itisonlyamatterofdegree,notsubstance.」賓架P話會叫辦公室助理去書局買兩本《圍城》，佢同我一人一本，睇完就交換心得。咦，做陪客食飯，又有「錢」落袋，L教授擺完，賓架P贈書，到占美廚房一行，回報率甚高。
L教授已經退休，佢年輕之時，曾經做過校外考試委員，收生時問學生一條問題，學生幾乎完全唔識答。譬如學生姓查，L教授問：「請問你點解姓查呢？」學生幾乎為之語塞，答：「我老竇姓查，所以我姓查。」就會唔及格，要答埋祖宗姓查，原籍山東，係南宋將軍，後避元兵追殺，移居浙江海寧落戶，歷代名人輩出，現代就有查良鑑、查良鏞、查濟民……
識得講家族來源（或者吹牛吹到似層層，以示口才使得），L教授就會放學生一馬。想落呢啲就係通識教育一部份，學生識得睇族譜，證明有知識好奇心，唔會差得去邊也。