唔經唔覺，鳳凰衛視女主播劉海若喺英國遭遇火車出軌意外後都快有兩年半啦，噚日係海若三十六歲牛一，佢同媽媽特登飛嚟香港，同一班鳳凰衛視嘅好友慶祝生日。得到屋企人同主診醫生凌鋒嘅悉心照顧，海若嘅身體愈嚟愈好，噚日推住成車行李，急急腳咁走去機場酒店，一啲都冇氣喘。
海若將會出席本周五樂施毅行者０４嘅開步禮，重會同鳳凰衛視高層組隊玩埋一份。毅行者要喺四十八小時內走完一百公里，海若信心十足，話路程有幾長，佢就有信心行幾遠。
其實海若真係好值得我哋學習，冇自暴自棄，保持鍛煉，終於喺上個月舉行嘅北京馬拉松，成功完成五公里賽事，連陪跑嘅劉媽媽都追佢唔到。海若𠵱家每個星期都練瑜伽、做柔軟體操，又做針灸，接受中、西醫治療同唱Ｋ練氣，重就快會喺鳳凰衛視主持一個健康節目㖭。
（圖）噚日係海若（左二）三十六歲生日，佢同媽媽劉黃中慶（左）、家姊青曼（左三）、姨甥女Vanessa（右）一齊喺香港慶祝。
張志華攝
傳真︰2623-9278
電郵︰