馮仁昭四圍超：
戚黛黛榮升老闆　緋聞男友變老竇

二○○三年度香港小姐季軍戚黛黛喺銅鑼灣開設嘅精品店前晚開張，佢榮升老闆娘，一班好姊妹好似楊洛婷、吳杏美同李詩韻當然有到賀，而戚黛黛父母同婆婆亦有撐場。

保養佳似三十
原來戚黛黛老竇個樣好年輕，五十幾歲人睇落好似三十幾歲咁，真係保養得宜，唔怪得之前有雜誌影到佢同戚黛黛一齊，重俾人話係個女嘅緋聞男友。
戚黛黛話：「人哋話我爸爸好後生，佢好貪靚，有時西裝骨骨咁，好有四哥風範。」世伯雖然俾人取笑係個女嘅緋聞男友，但都只係笑笑口保持緘默，真係好似啲明星傳緋聞咁，一於唔回應。

旅行搜羅精品
戚黛黛首次創業，投資六位數字，佢話由細到大同媽咪去親旅行都好鍾意搜羅精品，所以佢舖頭啲貨都係獨一無二，佢重話讀書時好鍾意做勞作，所以做咗好多裝飾品放喺舖頭，楊洛婷就話自己鍾意做衫，會車啲衫放喺戚黛黛間舖度寄賣。

徐子淇食糖怕中毒
徐子淇趁萬聖節由英國返咗香港賺外快，不時以鬼怪造型出現，子淇嘅扮相雖然唔夠恐怖，但都不失可愛。子淇話：「我覺得萬聖節好好玩，可以扮一啲好嚇人嘅面孔。而且我一向都好鍾意食朱古力，萬聖節有好多糖果可以食，但我就唔敢亂問人拎糖食，我怕有啲唔好心嘅人會落毒。」

戴夢夢鬼屋推人落樓
戴夢夢噚日去尖沙嘴為一個萬聖節扮嘢大賽做評判，佢為怕喧賓奪主，所以冇刻意扮嘢，只係笠頂高帽、搽吓啲指甲就算。戴夢夢話佢細個都會四圍拍門問人攞糖食，不過印象最深刻嘅一次係去旅行入鬼屋參觀，佢驚到推倒一個遊客落樓梯，搞到人哋要入醫院，嗰位遊客真係唔慌唔嚇親。

李玟胞姊拍拖懶理楊紫瓊
李玟大前晚為男友開生日派對，佢二家姐亦攜同新男友鍾再思出席。鍾再思係楊紫瓊嘅前度男友，唔知同鍾再思拍拖會唔會有壓力？李思林話：「唔覺得有壓力，始終拍拖係我哋兩個人嘅事。」

黃品源辛苦到屙血
黃品源噚日喺台灣搞咗個「感謝情人」簽唱會，唱片公司準備咗架豪華貨櫃車，駛去西門町做表演舞台。黃品源已經有兩年冇出唱片，今次為做宣傳，走勻全個台灣，搞到疲勞過度，屙尿屙出血，嚇到工作人員即刻停咗夜晚通告，送佢入院檢查，好彩醫生話冇大礙，休息番就冇事。