華大地產（201）上星期二公布出售威靈頓街商場項目，保守計數，PE將由家陣76倍大降到7倍，有得諗。華大呢期以2.8億元，出售威靈頓街一號荊威廣場商場業務，估計因而套利1億元，華大佔項目權益一半，即係話，04年度（12月止）下半年，有5000萬元純利入帳，單係計算呢壇製作，折合每股純利0.9仙，04年預期PE將由現水平76倍降至7.2倍。咪忘記，呢期酒店業好景，估計華大全年度來自酒店業純利，講緊1000萬元，全年純利上6000萬元，預期PE進一步調整到6.5倍。隻股最新6月底每股資產值0.207元，股價相對每股資產值折讓68%。加埋華大呢期專攻酒店業，12月聖誕假，少不免又翻兜自由行概念，若然有調整，係時候收吓貨。
漢國（160）將於明日舉行股東大會，表決係咪通過出售鑽石山地皮一事。股東大會喺上午11點開始，趁重有一粒鐘時間，買定離手。
呢次漢國計劃出售鑽石山前香島中學地皮，總代價5.65億元，據集團預計，若然成事，可獲利2.3億元，漢國去到上星期五，總市值講緊不過6.44億元，純利佔總市值達35%，所以，若果呢壇大製作獲通過，漢國05年度（3月止）PE極有機會調降到3倍樓下。事實上，就算排除呢壇資產出售，漢國位於羅湖城市天地廣場樓盤，銷情順風順水，又每股資產值講緊3.17元，資產折讓亦唔係細，有個底墊住，冇有好怕。
錢雋