陳奕迅下周正式簽約環球系唱片公司,與李克勤及許志安同門,安仔前晚為新秀任評判,他表示三人有如一個鼎,算是如虎添翼,但也有一山不能藏二虎的時候,克勤則提議公司簽約劉德華,以壯大實力。
李克勤、許志安、盧巧音及關心妍等前晚在電視城為《2004全球華人新秀歌唱大賽》擔任評判,結果來自馬來西亞柔佛州的王明麗以七百八十八分奪冠,而來自馬來西亞吉隆坡的吳國菲則得七百六十一分,險勝來自香港、得七百六十分的季軍王琪。
其中王琪份屬英皇娛樂旗下,評判之一鄭希怡(Yumiko)曾給他高達九十二分,被指偏私,事後Yumiko說:「佢真係唱得好好,個樣又似許志安,有潛質做明星。」
陳奕迅將於下周正式加盟環球系唱片公司,與安仔及克勤變成同門,問安仔會否感到受威脅,他說:「有好有壞啦,壞處係一山不能藏二虎,好處係如虎添翼,以前寶麗金時代都冇問題,唱片公司都好尊重我,一星期前已通知我,陳奕迅係另一個Label,唔係正東、亦唔係環球,各有各做,或者我哋三個一齊出碟合作咪重好,我哋三個等於一個鼎,每人一腳頂住,最好多隻腳打牌。」
對於被指在環球海報中因排後排而黑面,安仔說:「邊有呀?幾黑面呀?」
克勤則謂最好劉德華也加入環球,以增強公司實力,他說:「陳奕迅加入係好事,公司更加有實力,最好簽埋華仔,佢老竇係佢經理人,好易傾啫,我同公司提議過,但佢好貴,有埋佢,環球就可以返去全盛時期啦。」
提到宣傳費分配問題,克勤說:「睇自己賣唔賣碟囉,邊個賺錢就重視邊個㗎啦,我哋不嬲係譚詠麟最大。」據悉,環球方面已計劃安仔與陳奕迅明年將不會同期出碟,以免同門相殘。
採訪:王崇穎 攝影:仇志德