薛凱琪去年八月出道，直至今年四月推出處女碟，她憑一首《奇洛李維斯回信》迅速竄紅，該碟更締造近期銷量神話，銷量衝破金唱片的二萬五千張數字，令她人氣急升，隨即接拍了五個廣告、拍劇兼出寫真集，令今年才二十三歲的Fiona已賺取到人生第一個一百萬。
日前Fiona在將軍澳接受訪問時，談到收入，她即支吾以對儍笑說：「我舅父係我經理人，所以佢將我賺到嘅錢直接畀晒媽咪，媽咪幫我儲起佢，再畀錢我使囉。」Fiona又說：「我唔大使嘅，反而係拍劇嗰三個半月，我一個月嘅的士費成萬幾蚊，係用得最多錢嘅時候。」不過她的全年總收入也很和味，問她是否已賺到一百萬？她扭擰的笑說：「咁一百幾十，幾十一百萬都有嘅，但我會着重成績多過錢，我覺得自己係儍人有儍福啫。」
Fiona在這年來不停衝刺，缺乏休息，今年五月她作公開演出時已有聲沙迹象，到現在仍未改善，預計在十二月推出的新碟，亦因而拖延錄音進度。Fiona說：「以前我錄音可以唱八、九個鐘，𠵱家唱三個鐘把聲已經爛，以前啱啱出道時唔使做咁多嘢，家陣又要做騷又要影相又要錄音，弱過以前，我太攰，但唔可能唔做㗎。
「阿媽就成日煲開聲水畀我飲，我做騷唱歌一定帶住個銀色壺，飲啲嘢潤吓喉，好似婆仔咁㗎。」
Fiona雖然聲沙，但仍強調堅持現場演唱，她說：「我入行以嚟，試過有兩、三次咪嘴，一次係做無綫婦女節目，監製同我都覺得個情況係要咪嘴好啲；有一次就係自己病咗，雖然我唔係次次唱得咁好，但你唔畀我唱live我會好激動㗎！我記得有次上TVB嘅音樂節目，嗰日狀態唔係咁好，監製同唱片公司提議我咪嘴，我知佢哋好心，唔想我出醜，但嗰吓我覺得要咪嘴即係侮辱我，係咪我唱得唔好呀？唔好你又簽我？迫我咪嘴好唔開心囉，唱live係會撞板，有時我都會有少少走音，但都要累積經驗，不過講真，咪嘴都驚㗎，譬如歌詞係『你』，個口就唱咗『我』字，加埋個大頭鏡，咪錯真係好肉酸。」
以Fiona今年全年走勢而言，她應大有機會成為年尾樂壇頒獎禮的女新人王，但她聞言即睩大眼說：「係新人，唔係王。今年啲女新人都好強，Isabella（梁洛施）青春無敵，官恩娜唱得好，吳日言好nice，令人好舒服。我唔係太緊張頒獎禮，努力成年，答案就喺個信封入面，係改變唔到㗎，我嘅壓力係點搞好張新碟，頒獎禮就當係一個party囉。」
採訪：朱倬誼 攝影：仇志德
化妝：JessciaChan
髮型：Derrick&Wil（Chin.G）