齊齊砌南瓜動手扮嘩鬼

人間慘劇！萬聖節出現一批穿上Bossini萬聖節服飾的嘩鬼，光頭神探跟隨小辣椒採訪嘩鬼化裝派對，不幸「意外身亡」！兇器為丫叉、手指、鐵鈎，有圖為證。
以上純粹講笑，不過光頭神探確實被戳中身體多個重要部位，大家記着開派對也要注意安全啊！

記者：小辣椒　攝影：光頭神探

史上最惡小蘋果
小蘋果年紀輕輕，已經識得嚇人的本領，大家都傾向用血淋淋的紅色和神秘的迷彩色。不過睇得出女仔都係貪靚啲，Michelle同恣貞點都保留幾分人面，即使梓喬畫到花面貓，但顏色運用同上色技巧都受到化妝哥哥點名稱讚呢！

■嘩鬼興奮過度，可以想像攝影師哥哥光頭神探身上會有多少處致命傷痕。

■韋忠個樣重惡過頭頂的魔鬼頭，最欣賞佢連脷根都見埋！

■魔鬼梓墩揸住丫叉神情惡毒，演技都唔錯。

■淚眼夫人恣貞左眼紅圈搶鏡，但V字眉重勁。

南瓜兩大不思議事件
化妝後分兩組進行比賽，結果當然係皆大歡喜，不分勝負。原本要求小蘋果用糖果砌一個最大的南瓜，最終發生兩件奇事，首先係派畀第一組的果汁糖不翼而飛，得番Bossini糖；另外本來第二組砌南瓜又快又靚，但係大家講吓講吓又再砌過，最後竟然慢過第一組，好彩終於砌成一個用晒所有糖果，長到似木瓜的南瓜。