兩星期前講過一啲冇咁正常而又另一部電影開拍嘅原因，只係講咗一個，今個星期好想講多個。
首先有件事要好清楚，我講嘅係商業電影，定義係有人投資，電影完成後會上映，目的係希望最多嘅觀眾會去睇嘅電影。附帶希望觀眾會喜歡呢部電影，喜歡佢嘅內容，喜歡佢嘅含義，喜歡佢嘅所有嘢。如果拍電影只係想你阿媽讚你，或者係多啲女鍾意你，又或者唔知點解，總知好想做導演，以上嘅情況都不在討論範圍內。
另一個冇咁正常而又最經常發生嘅原因係等錢使，呢個原因係最易理解而無可口非，我都試過。大家唔好鬧住，靜心諗一諗，千祈唔好睇小等錢使對一個人創作上嘅推動力，歷史上有好多畫家，音樂家，作家都係最等錢使，至就快餓死嘅時候就出現最好嘅作品。咁當然呢個等錢使嘅人係需要有高尚嘅情操同超乎常人嘅挨肚餓能力兼冇諗過不如去打劫。所以呢啲人好少。不過拍電影就有啲唔同，上面嘅例子係一個人等錢使。但係拍電影有時係大範圍嘅等錢使，即係集體等錢使，咁就真係有啲濕滯。因為一個創作人等錢使，諗住開部戲都幾難會成事，但係碰啱個老細又有啲等錢使，明明覺得個ideas嘛嘛，但係諗住博一博咁就有啲機會開拍喇。跟住去搵個明星，個明星心裏面就唔係咁鍾意個ideas，但係內心深處就更加痛恨嗰種等錢使嘅感覺，結果應承咗，咁就更加有機會開拍喇！餘此類推，集體等錢使嘅範圍越大，推動一部戲開鏡嘅動力亦都越大。咁講好似有啲過份，但係我覺得唔緊要，呢個世界有邊個唔等錢使，李超人咁有錢都重要係咁搵我哋啲錢。所以最緊要係就算好等錢使都要拍部對得住觀眾嘅戲，如果唔係咁諗，不如去打劫。