起初「煲」《導盲犬小Q》只係抱住「睇吓」嘅心態，諗死佢唔係唧你眼淚就Sell你Cutie；認真睇落，難得感覺拍法自然平實，情感嚟得摰真摰深，從小Q身上，重令你肅然學會對其他生命的尊重，和關心到社會上的弱勢社群；睇《導》絕對唔係狗Fans專利，如果你做人已經麻木到，見人賣旗就掉頭走，或者未睇小Q，已經想買隻狗仔返嚟養，看畢全片會令你有深刻的反省。
記者：朱崇德
DVD $69(普通)$99(特別)
VCD $39
發行：PANORAMA
區碼：3區
電影《導盲犬小Q》改編自日本真實傳記故事《再見了．可魯》；出版不足一年，已經譯成幾國語言，總銷量高達百萬冊，絕對是近年Hit書；故事中的小Q全名為Quill，意即大羽毛的意思，湊巧同小Q身上的斑紋十分相似，或者這正好是小Q一生的寫照；一隻導盲犬的一生，可能輕如鴻毛，但牠的一生經著書及電影的傳世，教授的意義卻猶如泰山。
小Q係一隻拉布拉多犬，由於父母其中只有一個擁有導盲犬的血統，在幾經艱辛下才被挑選作訓練犬（因為一般要求純導盲犬血統）；做導盲犬的第一步，就是在出生後45天內離開原主人，寄養在特別挑選的寄養父母家；因為要建立良好的人、狗關係，寄養父母並唔可以「打」小Q，事事要循循善誘，唔係睇《導》一片，都唔知做導盲犬訓練係咁嚴格。
在寄養一年過後，就可以正式入讀訓練學校，由於小Q血統唔純正，起初的訓練真係困難重重，在幾經艱辛下，小Q以堅忍的精神與良善的本性，終於克服了重重的考驗，可惜等待牠的主人，竟是一個不愛狗的「古怪」渡邊先生，小Q以至溫馴的本性及忠誠之心，令兩人關係拉近，可惜美好的時光並不長，緊接而來竟是再一次的生離死別。
睇《導》感受至深處，第一樣是人狗間點樣建立良好互信關係；香港人居住環境狹窄，好多人強行養狗，根本已經是一種虐畜行為，管教唔好、肆意虐打、愛理不理、隨意遺棄，在香港都係經常事；睇完小Q後，令人會感受到動物都有人性一面，絕對是一個值得我們尊重的生命個體，養狗者或準養家，真係要細味細看。
另一樣令人體會深刻的，是飾演盲人的渡邊先生，唔講都唔覺得，原來好多生活小節，在盲人的生活世界裏，竟然是如此艱難，單是過馬路，已經唔係個個街口有聲響警示，再簡單如去超級市場買菜，更全無輔助設施，真係隨時買咗乜嘢都唔知，不過最諷刺的，是用自動販賣機，簡直有如玩「扭蛋」，普通飲品冇盲人凸字、消費品類嘅啤酒就有嘞！
由於電影是改編自《再見了．可魯》傳記式文章，導演在電影處理手法上，多用了敍述的手法；有人睇後覺得情味沖淡，不過我倒覺得情感表現更真切，亦表現出「傳記」的精髓，相反如果處理手法誇張，反得煽情的感覺。此外，亦有人話故事結尾太傷感，唔係太適合小朋友睇；現實中有幾多事能盡如人意，生老病死更是自然不過的事，太美麗的童話，未必令人得益，反而順應「自然」，更令人容易體會現實。
至於聲效方面，中文版搵來了梁詠琪、梁家輝、阮小儀、林曉峰等作聲優演出，聽起上嚟零舍令人入戲；不過個人喜好都係日版，音效始終感覺靚啲，而且小Q嘅聲效亦明顯突出好多。Bonus部份大部份都係圖冊，亦有以上幾位明星對《導》的內容解讀，值得一看。
