查史美倫係中港兩地嘅證券界風雲人物，人人都知道佢係查濟民嘅新抱、係留美法學博士、係律師、曾經做過香港同中國證監會副主席。不過，對於佢本人嘅家世，就好少人講。
佢前排俾阿董邀請入行會，大家又再想知多啲佢嘅嘢，早前有人形容過查太係孝順女一名，佢長駐北京時，經常飛去上海探望老父；𠵱家回港發展，亦不時往來香港同上海兩地。
史老伯年輕時做邊行八方唔知，只知史美倫喺上海出生，自小隨父母嚟香港定居讀書，佢雙親幾時再重返上海老家？佢哋喺上海重有乜嘢人脈關係？會唔會係老江朋友？唔知各方友好有冇史家嘅料相告？事關八方翻查所有資料，呢位風雲人物本身家庭背景，竟然係一隻字都冇，八方試過問佢喺美國威斯康辛大學嘅校友梁天偉，佢都話唔清楚，只記得讀大學時期嘅查太已經好醒目，佢哋當年威大嘅校友間中都有聚頭歎吓茶，大家都識嘅重有邵善波同周松崗。
至於阿董，八方知道佢真係好賞識查太，重諗過搵佢坐強積金個位，後嚟唔知點解唔成事啫。
傳真︰2623-9278
電郵︰