呢排老董又使出佢嗰招提升民望撒手鐧，就係收埋自己唔見人，果然萬試萬靈，唔只係民調民望上升，重因為佢冇乜機會上電視，連佢喺小朋友心目中嘅形象都因為咁自行美化咗，選咗佢做最信任政府官員。
港台節目《笑笑小論壇》搞咗個網上投票，由十四歲以下小朋友，選佢哋最信任官員、議員同電視台，老董就打低佢隻馬仔煲呔曾，做咗最信任官員，又再證明只要老董唔好曝咁多光，唔使成日見到佢副尊容，就真係連師奶細路都覺得佢係好特首。
至於最信任議員就由大班打低長毛，大班一向有佢講冇你講嘅作風，真係你唔信佢信邊個！長毛抬住副棺材都唔係佢嗰皮。
講到最信任嘅電視台，就由無綫打低港台，呢個就梗係啦，無綫炒晒成班資深記者，重夠膽話可以繼續做新聞大台，做埋銀河衛視個廿四小時新聞台都得，八方心諗真係只有十四歲小朋友先會信佢。
不過，其實又唔好睇小班小朋友，有時佢哋問你問題，一樣可以問到你口啞啞，《笑笑小論壇》有個小記者訪問長毛同嫻姐，小記者係咁問長毛乜嘢叫十月革命，乜嘢叫托洛斯基，搞到長毛話要畀個電郵佢，同佢認真討論，真係唔可以低估新一代！
（圖）長毛同嫻姐喺港台《笑笑小論壇》畀兩位小記者訪問，長毛平日連阿董都唔畀面，喺小學生面前一樣要乖乖坐好，做個好榜樣畀小朋友。 梁祖彝攝
傳真︰2623-9278
電郵︰