薛凱琪（Fiona）年初的處女碟締造金唱片數字之餘，她也承認已賺獲百萬身家，不過換來的代價卻是被是非轟炸而搞到自閉暴食，而她在入行以來就因情況不許可而三次咪嘴，不過Fiona就強調以後堅持唱現場，她說：「要咪嘴即係侮辱我！」
薛凱琪早前接拍無綫劇集《學警雄心》，她首次拍劇即與對手陳鍵鋒鬧不和，及後兩人突然變friend，極度戲劇性。
對於這段峯迴路轉的變化，Fiona說：「日日話我哋不和，咪又係次次影合照，初時都有啲尷尬，但時間可以證明一切。」
Fiona不時被人取笑長頸，但她說：「啲人話我似親嘅都唔係人嘅嘢，又話似ＥＴ又話似卡通，我拍緊劇嗰時，啲工作人員成日講笑，話呢個星球唔啱我，叫我gohome、phonehome（ＥＴ口頭禪）。我唔mind人話我頸長，頸長着好多衫都靚㗎，我mind嘅係啲負面新聞。」
早前屢有報道指Fiona怕辛苦、耍大牌、沒禮貌，她帶點不滿地說：「負面新聞係最易入腦，你做十單慈善嘢，唔及一單負面新聞咁易被人記得，公司同我講過，話任何人都必定要過負面新聞嘅階段，我希望自己係過咗啦，唔好再有咁多是非啦。」
想起那段被是非纏身的日子，Fiona透露當時自己也變得有點奇怪，她說：「拍完劇之後，我日日屈喺屋企，唔約人出街，唔同人講嘢，但不停狂食，公司於是畀我放假，我同爹哋去咗旅行，返嚟就冇嘢啦。可能嗰時係自己唔慣，又唔識宣洩，好彩我本身屬於開朗嘅人，唔係癲咗好耐咯！」
