講開三三四學制，左丁山舉腳支持。一位讀者Tracy整封英文電郵過嚟，批評左丁山親李（國章）。係咁推銷，請左丁山尊重言論自由。Tracy自己話在加拿大讀中學，但封電郵英文甚多文法錯誤，即使係informal，都唔使自由散漫到咁吖嘛？Tracy話加拿大中小學讀十二年，準備學生入大學，每班人數少，大約十五人，科目甚多，任學生揀。Tracy跟住話：You'renotformeducationalbackground,Idon'tthinkyou'requalifiedtohard-sell334format。如果去加拿大讀中學，讀出咁嘅英文，不如留番響香港讀。
左丁山嘅外甥老早跟隨父母移民加國，二○○三年讀完中學，重係加拿大最後一屆grade13（相等於中七）畢業生，之後西安大略就向美國及加拿大其他省份看齊，讀完grade12就入大學，正是三三四學制。香港二○○八年先至實行三三四，已經遲過人。
另外，許為天校長來中文電郵講三三四。本欄於十月二十二日話《校長有責》，提及許校長，一時手快，令到許校長覺得左丁山質疑「本校學子，也就是本人難過之處，亦盼閣下慎重其事。」首先，左丁山唔知道許校長屬於邊間學校，如果佢覺得難過，請接受左丁山道歉。
主要爭論係三三四學制會否令學生知識層面變得薄弱，許校長對《蘋果日報》講：「學生若側重選讀生物及化學等理科，反而令他們的知識層面變得薄弱。」若五二三現行學制下，理科生修讀中英數附加數理化生共七科必修，再選讀一至兩科（好多學校嚴格限制選科）去考會考，與許校長所言有何不同？三三四學制在近似選科基礎上，加多一科「通識教育」，又點會曳過五二三呢？