金像影后妮歌潔曼（NicoleKidman）近年主演嘅電影備受外界關注，好多人都想睇吓佢有乜嘢突破性演出，而今個星期喺美國公映嘅爭議性懸疑新片《Birth》相信就可以滿足呢類觀眾，事關妮歌喺入面會同《複製兒魂》童星金馬倫布賴特（CameronBright）有肉帛相見嘅沖涼場面，兩人重會有接吻鏡頭㖭。
呢部早排有份競逐威尼斯影展金獅獎嘅作品，講述妮歌飾演嘅Anna，仍然好掛住佢死咗十年嘅老公Sean，正當佢準備下嫁另一個男人前夕，由金馬倫飾演嘅神秘十歲男童突然走入佢屋企，重話自己係Sean嘅轉世化身，Anna當堂大吃一驚。
而最令妮歌驚訝嘅地方，就係呢個細路竟然可以講出Anna好多只有佢老公先知嘅秘密，令到由羅蓮柏歌（LaurenBacall）扮演嘅Anna媽媽都感到好不安！不過Anna慢慢開始覺得呢個係佢能夠重拾至愛嘅最後機會！
雖然電影題材備受爭議，但妮歌就有另一種睇法，佢話：「呢部係一部關於愛嘅電影，非常純潔，唔涉及性嘅問題，即使兩個人可能非常密切，但係部戲係講女主角同某人嘅靈魂相戀。」妮歌亦不滿外界胡亂批評戲入面嘅親熱場面，佢話：「呢個就係成個世界嘅問題，啲人經常對佢哋未明白或未遇過嘅事有先入為主嘅想法，今次又係另一個例子。」