馮德倫與黃秋生早前因電影對白而爭拗，吳彥祖前晚出席活動時，指兩人大打出手，馮德倫更被秋生打到流血，不過黃秋生及馮德倫均否認打架一事。
吳彥祖、陳子聰、連凱、官恩娜和蒙嘉慧等前晚在中環出席PaulSmith時裝騷，眾人各獲品牌贊助新裝。黃秋生早前接拍馮德倫執導的《精武家庭》，因不滿一句「音樂人吸毒」對白，向記者投訴，惹來馮德倫不滿，兩人因此嗌大交。
同片的吳彥祖前晚說：「都有啲火藥味，係為嗰句，最後秋生都冇講到，cut咗呢句啦。」此時其助手在旁勸他收口，但吳彥祖仍滔滔不絕的說：「𠵱家冇事啦，馮德倫打贏咗秋生，秋生初時一拳拳打過去，不過馮德倫唔認輸，打到喊晒口都唔理。」問吳彥祖兩人可要入院？他說：「唔使，流咗啲血啫，Stephen（馮德倫）係好導演，秋生又係好演員，大家各有立場，加上兩個人火爆先咁啫。」
其後，吳彥祖為任亞姐表演嘉賓時說的粗言道歉，他說：「對唔住，下次我都會控制吓自己。」吳彥祖及陳子聰等一行人其後坐在第一行睇騷，吳彥祖女友、名模LisaS.出場行騷，眾人即時起哄，令到吳彥祖掩嘴勁笑。完騷後，一對情人拒絕合照，但坐同一架車離去，吳彥祖上車後又無故做出反V粗口手勢，LisaS.則突然伸出舌頭。
就打架事件，秋生昨日在電話中說：「冇呢咁嘅事，吳彥祖咁講好離譜，不如話我殺咗佢（馮德倫），重分埋屍㖭。我點可能打人，呢啲係刑事，要報警。」問到秋生這件事可會影響與馮德倫的友情以及日後合作？秋生說：「我哋冇友情，我只係接拍佢啲戲。」而馮德倫則在電話中說：「Daniel（吳彥祖）個衰仔打咗電話畀我，佢話同記者開咗個玩笑。呢啲嘢點可以講笑，呢個誤會會傷害我同秋生之間嘅友情。我係導演，如果真係俾人打點可以唔出聲，咁好冇尊嚴。」
採訪：顏英儀、比華利、陳月媚 攝影：陳慧安
