外資喺香港投資，有時都要入鄉隨俗，置地集團將中環置地廣場公爵大廈低座轉做酒店，計劃終於展開，噚日舉行動土儀式，點香燭拜神等祈求平安同順利嘅儀式梗唔少得。
置地、文華東方酒店同金門建築外籍高層，齊齊出席主持儀式，夠晒誠意。
文華東方酒店集團發展部總監施德信話，佢哋揀噚日動土，因為呢個係中國嘅良辰吉日，動土既係吉日，佢哋對酒店能夠明年落成，充滿信心。拜完神之後，一眾高層重食其燒肉大餐。
呢間香港置地文華東方酒店，明年第三季開業，共有一百一十四間房，房間平均大小係香港酒店之冠，重有埋最新穎嘅家庭娛樂科技，置地形容，係最富時代感嘅酒店。
地皮渴市，由銀主港基國際標售，灣仔道二二三至二二七號地盤，早兩日截標。
據悉，價錢吸引，銀行已經選定買家，成交價超過億八。以商住計，每呎樓面地價起碼五千；以純商業計，就高過二千七，拍得住信和最近向蜆殼石油買嗰幅灣仔軒尼詩道地皮。
負責招標嘅仲量聯行，原本都話噚日會有消息，不過突然轉軚，話下周先至有嘢講，對於成交消息拒絕評論。
今年豪宅造價升幅大，大潭陽明山莊物業代理都高調出稿，話自己有靚盤代售，一共四件，連車位，各有唔同賣點。
最貴係第四座二三三一室，逾二千呎，叫價二千六萬，擁大潭水塘及郊野公園景，室內設計糅合現代與古典特色。第五座二一三五室，近千三呎，叫價一千二百五十萬，賣點係智能裝修，全屋照明及窗簾，都用遙控系統控制。
另外兩件，第十一座一○六七室，以及第十八座一九五室，分別要二千五萬及二千四萬，兩伙都用咗一百萬翻新。
甲級商廈近排買賣增多，造價上升，原來乙級商廈都不俗。萊坊話，銅鑼灣富盛商業大廈二十二樓，近二千七呎，剛以近九百三十萬賣出，每呎三千四。業主持貨唔夠三個月，賺六成四，勁過豪宅。
核心區甲級商廈累積升幅大，投資者於是轉移搵乙級，回報有六七厘。
另外，銅鑼灣地舖值錢，搞到樓上舖都備受追捧，令呢啲可以做舖嘅寫字樓單位，呎價創新高。
地政總署周不時出售物業賺吓錢，如屬政府物業，多數由產業署負責；但由政府收番嘅私人物業，就會經地政總署，不定期集埋幾個，一齊標售。
最近地政總署標售七個港島及九龍住宅，都係啲業主冇交地租，政府又冇辦法追嘅情況底下，將物業沒收，大部份都有幾十年樓齡，其中部份連租約。七個物業之中，相信以北角和富中心三座十四樓B，最年輕又最值錢，千一呎，估計成交價要四五百萬。
電郵地址：
