效法江澤民退休嘅前港區人大吳康民，收咗聲好耐，日前突然在某報高調反毛，大罵長毛講嘢，中英文夾雜，係盡顯「殖民地奴性」痕迹咁講！
長毛豈係好蝦之輩，即時反擊，話吳康民嘅愛徒曾鈺成最近接受訪問，亦係中英夾雜，講到殖民地奴性，曾前主席亦唔執輸。跟住長毛又指出，江澤民公開講嘢，亦係以中英夾雜著稱，包括用帶住揚州口音嘅英語斷句，謾罵香港女記者「TooSimple，那衣褲」，丟盡國格。江澤民中英夾雜，係殖民地首席奴才，佢未落台時，吳康民屁都唔敢放一個，邊個似奴才？
其實吳康民呢篇嘢，係借長毛嚟痛罵江澤民，近日來親中小圈子竊竊私語，話吳康民係咪儍咗。因為長毛就算有一百條罪抵鬧，講嘢中英夾雜，喺香港人之間，由高官、大律師、警察嗌嗰句YesSir，至到電台DJ個個係咁，中英兩溝，根本就係香港話，有乜好挑剔？大家紛紛推測吳康民點解咁憎江澤民要鬧老江係奴才咁激？唔知係咪與老江任內吳康民被迫退有關。長期享受嘅特權受剝奪，又難怪老人家受唔住嘅。不過，好似長毛話頭，佢夠薑就指住老江幅相大罵吖，點解要揀一啲弱勢族群代表嚟踩住上？呢鋪閃縮陋習，吳康民真係要戒咯。
傳真︰2623-9278
電郵︰