臨到年尾，百萬像素影相手機已經成為身份象徵，唔單止用家拎出嚟會惹來豔羨目光，亦都係手機廠實力嘅證明！單係呢個10月，湧出市面嘅百萬像素手機已經有5部之多，亦都令到市面上有售嘅百萬像素手機增至超過10部。今日《流動通訊》就嚟個大晒冷，齊集全港所有百萬像素手機，等大家作個參考，齊齊升級做「百萬富翁」！
記者、攝影：劉耀祥 ImageGirl：Kendy 鳴謝：環宇鋼具
雖然百萬像素影相手機統統都以百萬像素鏡頭為主菜，不過要做一部出色嘅百萬像素手機，配菜亦都十分重要，例如配上又大又靚嘅彩芒、出色嘅聲效、UserFriendly嘅介面、無限大嘅記憶體，先叫得做Perfect！而今次就將百萬像素影相手機分為三大類，照顧唔同需要嘅用家，睇吓邊一類先最啱你！
大芒類
除初推出時略掀炒價潮，近呢兩個星期S700i嘅價位已經「冷靜」下來，保持於$4,800咁上下嘅價錢。雖然上下顛倒嘅旋轉芒被用家略為詬病，不過絕對無礙S700i嘅凌厲氣勢，因為S700i唔係單單賣樣，而係周身刀張張利。首推320×240像素高解像度TFT靚芒，Size唔係特別大，但係睇相就已經明顯比同級超班，加上用130萬像素CCD鏡頭，睇相真係無得彈。靚芒之外，S700i亦都有靚聲兼靚Game，40和弦只係指定動作，支援MP3鈴聲先最受用家歡迎，延續K700i大聲公傳統，就算唱緊K都一樣聽到電話響。機內兩個Game都係3DJAVAGame，立體飛鏢同實境網球都玩味十足，睇得又玩得。
制式：GSM900/1800/1900MHz三頻
顯示器：26萬色/320×240像素
鏡頭：130萬像素
記憶體：內置30MB/MSDuo記憶卡
功能：藍芽、紅外線、40和弦、3DJAVA、無限拍片、收音機
備用時間：170-300小時
通話時間：7小時
體積：107.5×49×24.5mm
重量：137g
相片十分精細，留意衫上花朵就可以睇得出CCD嘅威力。
現時全港唯一具有Touch芒之百萬像素手機，乃眾機中最大芒者，所以價錢亦十分「揦脷」。採用Linux作業系統之A780，功能上亦十分齊全，藍芽、MP3鈴聲、40和弦等。
規格：GSM四頻、6萬5色內芒、130萬像素鏡頭、T-Flash記憶卡、藍芽、40和弦、MP3鈴聲
$6,980（a）
首部到港之百萬像素影相手機，推出已經有半年時間，但係價錢都一路企硬貼近$4,000。其100萬像素鏡頭及超靚嘅320×240CGSilicon顯示器絕對係令價錢企硬的原因！
規格：GSM四頻、26萬色內芒、100萬像素鏡頭、SD/MMC記憶卡、藍芽、40和弦、MP3播放
$3,630（a）
插卡類
Nokia7610推出已經一段時間，點解仍然要作為插卡級嘅推介機種？原因其實都係錢作怪，因為近期7610價錢一再探底，由最初嘅$4,180，跌至日前$3,500都唔使，兼且重要送128MB及64MBRS-MMC記憶卡，絕對係超抵玩之作！作為Nokia首部百萬像素影相手機，唔係只靠鏡頭撐場，用上SymbianSeries60作業系統，好處就係可以隨時從網上下載Symbian程式安裝，變化多多，點玩都未有咁快悶。
其他功能亦甚有睇頭；支援48和弦以及MP3鈴聲，電話響唔使成日「叮叮、噹噹」咁悶，不過最可惜係MP3只有單聲道，用耳筒聽歌就唔夠過癮。另外亦支援藍芽功能，方便用家Send相畀其他藍芽手機。
制式：GSM900/1800/1900MHz三頻
顯示器：65,536色/176×208像素/TFT
鏡頭：100萬像素/4倍數碼變焦
記憶卡：RS-MMC
功能：藍芽、JAVA、GPRS、48和弦、拍片、MMS
備用時間：10.4日
通話時間：180分鐘
體積：108.6×53×18.7mm
重量：118g
雖然整體顏色較淡，不過最出色地方在於背光環境下，主體面部仍清晰可見，唔會做咗黑面神。
7610的孖生兄弟，不過就遲成幾個月先出世，外形只係鍵盤排列由旋風式改為直立式，功能與7610並無太大分別，特別在於加入防毒程式，以及DirectPrint功能，方便用家直接以藍芽接駁打印機。
規格：GSM三頻、6萬5色芒、100萬像素鏡頭、RS-MMC記憶卡、藍芽、和弦、MP3鈴聲
$3,680（a）
兩吋大芒配上細小機身，兼且可以用盡兩吋大芒作全螢幕拍攝，影得開心睇得過癮。而S65亦支援RS-MMC記憶卡，插槽特別設於機底，毋須熄機拆電，換卡方便又容易。
規格：GSM三頻、6萬5色芒、130萬像素鏡頭、RS-MMC記憶卡、藍芽、40和弦、紅外線
$3,280（a）
突破性嘅旋轉機種，再加上融合摺機設計，搞到你揭完又轉、轉完又揭，提供多角度觀點。除影相之外，亦具有60分鐘拍片，用家亦可將短片做成Wallpaper，自創短片背景！
規格：GSM三頻、26萬色內芒、100萬像素鏡頭、RS-MMC記憶卡、64和弦、紅外線
$4,880（a）
無卡類
Toplux是首間引進26萬色彩芒到港的手機商，雖然今次百萬大戰中未飲頭啖湯，不過唔緊要，因為新機AG300亦一樣有充足賣點，就係以細取勝。細到只係同兩隻麻雀差唔多大嘅AG300，以女性用家為主要目標，外殼劃上幾何線條，有幾分藝術氣質。全機重點嘅130萬像素鏡頭則設於機面，鏡頭旁有個月亮形自拍鏡，可謂創意十足。
顯示器尺寸約1吋多啲啲，以為睇得會好辛苦，點知開啟影相模式之後，重可以Show齊所有拍攝資料，光暗度、Zoom、解像度等，統統畀你睇得到，26萬色芒一樣交足功課，畫面中間更有對焦點，認真唔講得笑。AG300亦支持MMS、GPRS及WAP等，當然重有64和弦，以一部細成咁嘅機嚟講，真係名副其實「麻雀雖小，五臟俱全」！
制式：GSM900/1800MHz雙頻
外芒：OLED/64×48像素
內芒：26萬色/128×128像素
鏡頭：130萬像素
記憶體：12MB
功能：64和弦、拍片、JAVA、MMS、GPRS
備用時間：100小時
通話時間：227分鐘
體積：71×37×23mm
重量：79g
咪以為機身細，就會偷工減料，相片質素令人有驚喜，主體及背景都清楚顯示，只係邊位有鬆散情況。
AG300主打愛細機嘅女用家，新機CG360走回Toplux一貫風格，比AG300更適合男性用家，同樣內置130萬像素鏡頭，2.2吋大26萬色彩芒，影相睇得夠清楚。
規格：GSM雙頻、26萬色內芒、130萬像素鏡頭、拍片、64和弦、JAVA
$3,380（c）
GI100既是PANTECH第一部百萬像素手機，亦都係香港首部內置指模掃描器嘅手機，只要用手指掃一掃，就可以將機內電話簿、行事曆及相片鎖起，高度Hi-Tech兼高度保安。
規格：GSM雙頻、雙26萬色芒、130萬像素鏡頭、錄音、64和弦、JAVA
$3,580（b）
屬於早期登陸香港嘅百萬大軍，靚鏡靚芒加上有靚聲，實力有番咁上下。不過機身體積較大及未能支援記憶卡，令人有點卻步，不過以$3,000唔使，就有130萬像素影相手機，抵玩！
規格：GSM三頻、6萬5色內芒、130萬像素鏡頭、拍片、64和弦、JAVA
$2,850（b）
雖然最細百萬像素手機之名被TopluxAG300搶去，不過INNO50嘅扭擰芒設計加上一身相機Look外形，兼且唔扭轉個芒都唔畀你影相，真係可以畀番你真正影相嘅感覺。
規格：GSM雙頻、26萬色內芒、130萬像素鏡頭、3D聲效、64和弦、JAVA
$3,280（b）
查詢
（a）全新世界（27872282）
（b）菱科傳訊（21099998）
（c）TopluxHK（25629106）