祖國失驚無神話加息，除咗保險股受惠之外，其他升得好地地嘅國企股大部份報跌。小初有唔少朋友剛剛入咗貨，好彩噚日跌幅未算太大，所以暫時都唔算好大損失。
不過，經紀陳就覺得可能係大戶一時三刻走唔切，頂住個價嚟沽貨，估計下周會見真章。但佢又話一眾炒家，絕大部份都係炒股唔炒市．尤其係有個別股份先至剛剛埋班炒上，實在好難話收就收。例如配股將落實的澳門實德（487），噚日就一度炒過上去0.97元，最後雖然收0.93元，但仍升9.4％，最勁係成交股數高達1.21億股，金額1.12億元，幕後炒家功架表露無遺。
另外，經紀陳又以易通控股（312）為例，市場傳隻股有動作好耐，終於在周三開車，連升兩日後趁勢回吐，噚日跌6.25％，收0.375元，成交縮至563萬股，金額212.7萬元。
經紀陳話，易通近排轉趨高調，市場傳聞可能配股集資，估計仍未到價，應該未炒完。
慕容小初