葉玉卿近日同老公胡兆明同埋囡囡，一家三口由美國返咗嚟香港，前晚卿卿成家人去咗銅鑼灣時代廣場嘅滬江大飯店兼大閘蟹專門店，同施綺蓮夫婦、周美鳳夫婦三家人一齊勁擦一餐，埋單承惠二千零蚊。
雖然卿卿已屆三十七歲，又已經係三個仔女嘅媽媽，但依然保養得唔錯。前晚九點幾，見佢同老公、囡囡匆匆去到酒樓，卿卿同個女一齊着住全身米白色套裝，卿卿濃妝豔抹，重着住緊身衫，令佢豐滿嘅葫蘆身材表露無遺。
大約十一點鐘，三家人食飽飯就齊齊走，周美鳳老公先去停車場攞車，其他人就喺街度等，唔少途人都認出卿卿。至於紅衣女郎施綺蓮雖然細卿卿四歲，但上個月尾生完BB，重未收身，反而肚腩凸凸。
卿卿多年嚟住喺美國，可能食得多西餐，所以佢次次返香港都周圍搵好嘢食，今年六月佢返嚟香港時，就特登去元朗大榮華酒樓食圍村菜，前晚佢食上海菜，亦叫咗臭豆腐、賽螃蟹同蟹粉小籠包等等，睇嚟呢位師奶確係識飲識食。
徐子淇噚日下晝由英國返香港，趁呢兩日萬聖節出席活動同拍廣告搵錢，有周刊話佢喺英國攬男同學，佢見到記者即刻否認話：「嗰啲只係西方禮儀，其實我都好驚，唔知俾人跟咗幾多日？可能我喺香港警覺性比較高，喺英國冇諗住有人跟我，不過嗰張相都冇乜嘢。」問佢擔唔擔心男友李家誠呷醋，佢就笑住咁話：「唔會啩，咁小事。」
那英男友高峰嗰單私生子疑案重未搞掂，前幾日高峰同王納文母子去做DNA鑑定，但要等佢哋上庭先會知結果，據知情人士話法庭會做進一步測試。不過又傳出王納文會同高峰庭外和解，因為高峰曾經向法庭提出唔想公開審理，而王納文嘅律師亦表示希望雙方庭外和解，所以最後應該會大事化小。
噚日有內地報章報道，話華納影視將以三億五千萬開拍《賽金花》一片，據知呢部電影重搵嚟揚名國際嘅安東尼明格拉做導演，而據知章子怡、翁紅同周迅就成為咗女主角重要人選，報道重話翁紅英文水準唔差，機會都唔細。
鄭希怡（Yumiko）噚日以超短裙出席喺奧海城舉行嘅活動，最近佢密密咁去內地登台搵真銀，講到內地嘅fans特別熱情，問佢怕唔怕啲fans會手多多？Yumiko話：「佢哋又真係幾熱情嘅，不過都唔怕㗎，公司嘅安排都好好，唔會太過擔心。」
