董特首宣布陳智思、查史美倫加入行政會議之前，鄭大班曾經向電台話過，佢聽到吳光正加入行政會議。結果吳光正冇份，有人話鄭大班收錯料。
本來以為大局已定，點知呢日左丁山中午行街去買麵包祭肚之際，行到太子大廈，想話過馬路入去文華酒店西餅麵包店之時，碰到貿易M。貿易M留學英國，官仔骨骨，無論冬天夏天，永遠着三件頭西裝，戴鉈表，成個英國紳士款。左丁山笑佢：「喂，倫敦街頭都好少有人着得咁四正咯噃！」貿易M話：「着慣咗，唔係咁嘅裝束，就好似唔可以見人。」左丁山大笑：「長毛開立法會會議都只係T恤一件咋！」貿易M面有不屑之色：「我哋唔同級數，唔同層次。」諗落又係，貿易M係英國式紳士階級，長毛係毛澤東信徒、哲古華拉嘅崇拜者，正是水溝油，永遠都會站於對立面。
貿易M對左丁山講：「嗱，講啲嘢畀你聽，董特首不久就會宣布委任吳光正入行政會議，鄭大班聽到嘅，唔係流料，只不過係有時間差啫。中央想話所有有資格競選第三任特首之人，都要在行政會議吸收經驗，學習政治。聽聞董特首唔係十分情願，要中央一再提醒，先至領會聖意，故此遲啲先至宣布！」
係唔係呀？咪噏得出就噏喎？貿易M話：「你成日去馬場，都知道賽馬有starter與non-starter之分，入行會就表示有出賽權，入唔到就係non-starter啦，明白未呀？」當然明白，特首打吡大賽已經開始報名，行政會議內就有齊啲starters，冇份入會嘅，已經得唔到中央祝福，可以安心繼續自己嘅工作！