大陸失驚無神加息，藍籌跌少少，國企跌得多啲。恒指唔見0.44%，國指則冇咗1.6%。全靠3隻國內保險股上升總共拉高國指30點（0.7%），國指先至冇咁難睇。
國壽C輪：國壽（2628）收5.15元，進帳3%，結果國壽C輪大領風騷，10大風騷輪有4隻係國壽C輪，升幅由27%至31%。末日輪9231有33球易手，銀両18球，輪價52仙，負溢價0.6%，槓桿率9.9倍，數據唔錯，但要留意下周四最後買賣，冇得守。主角（以成交而論）始終係2143，有304球轉手，佔發行量68%，收26仙，升19%，明年1月到期，溢價6%，槓桿率19.8倍（有效10.0倍），引伸波幅32.3%。炒上炒落，呢隻最啱。正股估計反覆向上，可候低位買2143短炒。
平保C輪：平保（2318）收12.25元，升4.7%。風騷榜上有4隻係平保C輪，升幅由26%至34%。2233收1.93元，升16%，升幅比唔上其他大槓桿率高溢價同類輪，但數據最實際係佢。隻輪明年2月到期，溢價1.5%，槓桿率6.3倍（有效5.4倍），引伸波幅30.0%。爆炸力係弱過其他同類輪，但勝在溢價低，輸起上嚟冇咁傷，有機會候低買貨。
人保C輪：人保（2328）收2.80元，只係爬高1格，因為升得少，C輪冇1隻可以打入風騷榜。人保C輪炒嘅情況，冇國壽與平保C輪咁旺，好幾隻啲溢價太高，大概可以諗吓嘅係4514，明年5月到期，輪價40仙，溢價10.7%，槓桿率7倍（有效4.2倍），引伸波幅41.0%。
章盛