精明消費：
小道具幫手扮鬼話咁易
後日就係萬眾期待嘅Halloween，相信所有面具、扮嘢裝束都已經俾人掃得七七八八。打算同班Friend出去玩但又未買面具的話，唔緊要，重有今明兩日可以作最後衝刺！買唔到面具的話，不如買其他古靈精怪嘅裝扮小道具，好似假牙、血淋淋爛肉，再唔係買盒油彩返去自己炮製鬼面同鬼衫，大人細路一樣啱玩，睇完以下介紹好即刻動身喇！
記者：黃婉冰
攝影：黃子偉、楊錦文、林栢鈞
Models：Nokia、Joanna（StarAsia）
扮嘢道具盞鬼血腥任你揀
搶購唔到面具，唔使騰住，唔戴面具重有其他扮嘢小道具，好似魔鬼角、怪獸耳、巫婆鼻、殭屍牙，全部都生鬼惹笑。想玩得激啲，重有荷李活都用嘅人造皮血淋淋假傷口，款式罕有又夠逼真。
生鬼巫婆尖鼻
巫婆最大特徵就係個尖到嚇人嘅鼻，想扮得更神似，買埋呢個巫婆假鼻就掂晒。鼻的造型夠神似，襯埋頂巫婆帽同掃把，咁就似到十足十！
售價：$8（a）
貼額魔鬼角
嫌一般頭箍式魔鬼角太幼稚未夠神似，呢款魔鬼角的邊緣，刻意做到凹凸效果，貼上額頭後再加少少血漿，效果就好似額頭生出一對血淋淋嘅魔鬼角，不妨試試！
售價：$12（b）
黑指甲假手指
扮巫婆另一必備Item，就係呢啲又黑又長嘅黑色手指甲。一Pack有十隻，套上手指幾可亂真，即買即玩，比自己塗黑色指甲油快捷方便。
售價：$58（c）
搞笑眼珠頭箍
估唔到一對布滿紅筋嘅眼珠都可以咁搞笑。頭戴兩隻生出突眼珠嘅手掌，驚嚇又過癮，手掌重釘上閃閃紅珠片，咁Sharp，啱晒女士們。
售價：$18（b）
着燈白骨眼鏡
小朋友不宜扮得太恐怖，呢副白骨眼鏡就最啱。一㩒掣，綠面巫婆兩隻眼就會着燈發出紅光，款式怪異盞鬼。
售價：$10（a）
罕有款式：怪獸耳大人細路都啱
扮鬼扮馬唔一定要整花塊面，好似呢對怪獸耳，市面較少見，套上耳仔後效果突出，就咁戴上去就搞掂，大人細路都啱。純粹搞笑唔想大陣仗，不妨揀呢款。
售價：$10（a）
流血不止插頭刀
頭插血刀年年都玩，想玩得更為逼真，呢把血刀就啱晒。刀內有血漿流動，驟眼睇就好似鮮血從刀上不停流下，做成頭部插刀而流血不止嘅假象，再加血漿效果會更逼真！
售價：$15（a）
嬌俏魔鬼假髮
一頭閃閃紅髮加埋對精緻魔鬼角，一睇造型就知係貪靚女士們嘅首選。閃閃紅髮在燈光下效果更閃亮，一身靚靚冶豔女魔鬼打扮去派對，必成全場焦點。
售價：$18（b）
荷李活都用：腐蝕爛眼勁逼真
連荷李活恐怖電影都用嘅人造皮道具，同人體皮膚好相似，像真度高。貼上面後，再加埋附送嘅血漿，隻眼就好似俾腐蝕液淋到又爛又流血，效果都幾恐怖！
售價：$199（c）
畫面顏料大人細路都啱用
唔戴面具，何不索性自己郁手幫自己畫個鬼樣？要畫得似模似樣，咁就要搜羅各式各樣嘅畫面油彩。以下介紹除有扮「科學怪人」、「白面無常」專用嘅淨色油彩外，重有螢光唇膏、短暫性染髮顏料，連小朋友畫大花面用嘅水彩同蠟筆都有，大人細路「扮一番」又點少得？
激似真血：自製巨型螺絲插頭
想平平哋玩，重有呢款巨型螺絲插頭，全套道具包括巨型膠螺絲一粒、假血漿一包，插面、插頭、插頸，任你自己黐，效果夠逼真就得喇！
售價：$8（a）
凝固血漿效果逼真
此血漿效果夠逼真，塗上待吹乾後，血漿會凝固變成立體狀，望落就好似流緊血一樣，用在血淋淋傷口，絕對係PerfectMatch。
售價：$25（d）
科學怪人綠油彩
想扮科學怪人扮得神似，呢支塗面嘅綠色油彩絕對唔少得。Cream狀質地塗上面後唔會乾裂，唔易脫落，玩成晚都唔怕甩到一笪二笪，用清水一洗即甩。
售價：$25（d）
金色油彩做銅人
想學人扮「十八銅人」，呢盒金色油彩就最適合不過。顏料不含有毒成份，可直接將之塗在面上，玩完用清水洗一洗就乾淨，好方便。
售價：$48（c）
女妖螢光唇膏
扮巫婆要黑色指甲，扮女妖不妨買呢支女妖專用唇膏。同普通唇膏用法一樣，塗上後，唇膏在黑暗中會發出詭秘的螢光綠色，扮女妖必備之物。
售價：$14.9（e）
畫衫彩筆自製HalloweenTee
想由頭扮到落腳，咁就唔爭在自製埋件鬼衣喇！市面亦有好多專為畫衫而設嘅顏料，一般分為蠟筆、水彩同顏料。顏料之中又以立體效果同會發出陣陣生果香味嘅最為特別，不妨買盒畀小朋友畫件獨一無二嘅萬聖節扮嘢衫！
詭秘夜光白油彩
白色畫面油彩，顏料內混有夜光成份，塗上面後，在黑暗環境下，顏料就會變成詭秘螢光綠色。於燈光下又會變回白色，日間做「白無常」，夜晚做「厲鬼」，一日可以玩晒兩個樣。
售價：$35（d）
玩完即洗染髮顏料
唔鍾意畫面，可以搞搞個頭，染頭顏料可以玩完即洗，染到鬼五馬六都唔怕。一套三種色重有埋靚靚海綿畀你上色用，簡單方便。
售價：$20（b）
細路至啱：油彩送埋動物耳仔
細路扮鬼扮馬都離不開動物樣，呢套顏料就送埋動物耳仔頭箍，畫完狗仔面再戴埋對狗仔耳朵，維肖維妙，顏料用清水清洗便可。
售價：$18（b）
店舖資料
（a）生意滔 旺角洗衣街127號C地舖（水務署對面） 34223101
（b）金輝玩具 旺角弼街73號地下 23903337
（c）JCSHOP 銅鑼灣時代廣場8樓833號舖 31022783
（d）LCX 尖沙嘴海港城3樓 31023668
（e）玩具反斗城 銅鑼灣皇室堡3字樓 29916222
（f）吉之島 鰂魚涌康山道2號康怡廣場南 28846888
（g）大眾書局 紅磡黃埔花園11期聚寶坊地庫B1b號舖 27739954
至特別：自製「發泡」立體畫
用「發泡」彩筆在棉質衣物上畫上圖案，等四至六個鐘，待顏料乾後，圖案就會凸起變成立體效果，再用風筒以100度高溫直接吹向已乾的顏料，顏料就會慢慢隆起如發泡膠條般。
售價：$15（b）
立體效果有埋生果香
除可做出立體線條外，每隻顏色重有香噴噴生果味。將顏料唧在棉質衣物上，待三十分鐘就搞掂，着住件又靚又香嘅Tee，唔搶鏡至奇。
售價：$18.5（g）
蠟筆一畫一熨就OK
Pentel衣物專用蠟筆，可以直接畫在棉質衣服上，畫完之後鋪上雪梨紙用熨斗熨一熨就搞掂，小朋友DIY另一最佳選擇。
售價：$9.9（f）