數吓手指，距離NDS嘅11月21日正式發售日，已經所剩無幾，15,000日圓賣價令全人類非常之期待，相反PSP一直未有公布售價、推出日期，搞到近期機迷注意力集中晒喺NDS度。不過根據SCE最新發布嘅消息，就係維持原案，即如期喺年尾推出PSP，而且鐵定日期為「雙12」（12月12日），擺明狙擊NDS之餘，重要食埋聖誕嘅黃金檔期。
記者：徐影龍
論到最震撼一點，就係日版PSP賣價定為19,800日圓，即係$1,400港紙！比當初傳聞200蚊美金重要平。據行內人士估計，PSP根本冇可能做到呢個賣價，僅及成本嘅一半，重未計龐大開發費用！試諗吓，相較NDS，PSP只係貴$300港紙，賣相亦比NDS纖巧美觀得多，重要有個4.3"超大彩芒，就算你唔熱愛打機同睇戲，當買部MP3機都抵番啦！呢招絕對係有效壓制NDS嘅手段之一，若能成功推動UMD光碟格式，之後版權條數重有排計，可算係「蝕頭賺尾」嘅如意算盤。
至於最多人擔心嘅耗電問題，始終PSP配備一個咁大嘅彩芒，加埋高速處理器嘅運算，話唔食電就肯定呃你！官方宣布，PSP遊戲執行時間可達4小時，若關閉WLAN及以最低屏幕亮度嚟玩，更可達6小時。若果屬實，的確令人對PSP更有信心。順帶一提，香港行貨PSP雖未能跟日本同步發售，不過嚟緊嘅亞洲遊戲展度，SCEH除咗擺放大量PSP俾人試玩外，重會宣布一個有關PSP嘅重大消息，詳情要留意《爆機狂迷》嘅報道喇。
■可算係齊料套裝PSP，包括多一嚿鋰電、線控耳筒、32MBMSDuo、軟袋等。
