魏駿傑在無綫劇集《爭分奪秒》中，飾演一個勁cool的黑幫大佬，不過現實生活中他卻樂於在廚房做住家男人。他為了煮得一手好菜，更專誠拜師學煮法國菜，煮起來亦有板有眼，絕對有大師傅的功架。
魏駿傑閒時喜歡親自入廚煮兩味，與女友滕麗名及三五知己，一起品嘗自己精心鑽研的美食。為了進一步研究廚藝，他日前到灣仔某餐廳，請教老闆兼總廚Eddie煮法國菜的竅門。
魏駿傑當日換上廚師服，煮到一身大汗，學了「鵝肝配砵酒汁」及「帶子扒配魚子醬炒蛋白」兩道菜式，他說：「鵝肝配砵酒汁呢味菜最難整係個汁，師傅話要用牛骨、牛尾、菜同紅酒等好多材料熬四日，至於炒蛋白嘅時間就要掌握得好好先做到。」
魏駿傑表示不用開工的日子，家裏總是三日一小宴、五日一大宴，他說：「我好鍾意見到人哋食完覺得好味嗰個滿足樣，唔一定要食貴嘢，最緊要煮嘅過程用心，我寫寫埋埋啲筆記都有幾百頁㗎，阿滕成日借頭借路睇我本秘笈，依家煮餸都好掂㗎。」
魏駿傑透露自小已愛入廚，而且喜歡跟阿媽行街市，他說：「我好細個就去咗外國讀書，我好鍾意入廚房睇阿媽煮嘢，周不時樣樣搞吓，覺得好好玩。」
魏駿傑的另一嗜好亦與下廚有密切關係，就是將自己出海釣到的魚穫拿回家親自下廚，他說：「釣魚都有秘笈㗎，要記低邊日係幾月初幾，要知乜嘢水流、乜嘢水溫。上個禮拜就釣咗條七斤嘅石斑。釣到魚就當場放血兼用海水浸住，千祈唔好用淡水洗，會破壞咗肉嘅組織。通常釣到一斤以下嘅魚要放生佢，唔畀時間啲魚長大就食佢，個海會好快冇晒魚，係好唔環保㗎。」
採訪、攝影：卓美娟
場地：oisonIVY
