梁詠琪（GiGi）參演的舞台劇《大娛樂家》今晚公演，昨日她以三個不同造型綵排，其中以夢露Look最性感。GiGi自言不怕洩春光，最辛苦反而是穿高跟鞋排舞，疲累得如被人打了一身。
梁詠琪、詹瑞文和藍奕邦昨日在尖沙嘴文化中心，為今晚舉行的舞台劇《大娛樂家》作最後綵排，GiGi昨日以夢露look、邦女郎look及穿燕尾服亮相，其中以夢露look最性感。
穿上性感紗裙的GiGi腳踏三吋高跟鞋在舞台上跳舞、轉圈及上落樓梯，問她可擔心走光？她說：「我唔驚走光，已經試過好多次，而且打晒底，唔使擔心。但係着三吋高踭鞋跳舞真係好攰，對腳最受罪，跳完就好似全身俾人打咗一身咁，不過都係值得嘅！」
正式演出當日，GiGi會以十五個造型示人，所以她表示單是換衫已經換到氣咳，不過最慘是她的粉臉因每日長時間用膠紙貼着咪高峯，所以每日綵排後，她要鼓足勇氣才能除膠紙。GiGi笑說：「我一練完就要好殘忍咁撕咗張膠紙，搞到我塊面𠵱家有條痕喺度。」
不過，GiGi覺得做舞台劇最困難是結尾的一段自白戲，她說：「我扮其他角色時可以豁出去，但係做番自己時，就要講自己入行嘅感受同體會，我最驚自己講到喊！」
此外，對於好友楊采妮日前被傳在內地拍戲墮馬受傷，GiGi聽罷即說：「佢身手咁敏捷，唔會有事，而且如果有乜嘢事，佢都會通知我，因為我同佢一齊寫緊個專欄，所以要成日保持聯絡。」而楊采妮經理人已澄清楊采妮沒受傷，下巴受傷已是個多月前的事，現已康復。
採訪、攝影：駱華齡
