英國女星伊莉莎伯凱莉（ElizabethHurley）日前啱啱飛咗去澳洲，為由佢做代言嘅EsteeLauder出席剪綵活動。前日凱莉着咗條性感吊帶裙現身悉尼最大間嘅百貨公司，鬼咁風騷。佢剪完綵之後又為到場fans簽名，表現得非常友善。
凱莉此行重為支持國際乳癌基金搞咗個三十六小時嘅籌款活動，但即使咁忙，依然俾記者發現佢一到咗悉尼就同印裔男友艾雲尼亞（ArunNayar）拍拖，重去咗百貨公司買靚衫。之後，呢對情侶重一邊等EsteeLauder代表出現，一邊食咗兩個半鐘頭午餐，真係好歎！
我大口羅拉重八到隔籬枱有個南非有錢佬，特登柯打咗支成三千蚊嘅香檳畀凱莉，不過，呢位阿叔覺得凱莉多謝都冇句，似乎冇乜禮貌。
另外，金像女星雲妮絲惠嘉（ReneeZellweger）噚日亦都喺悉尼出席新片《BJ單身日記：愛你不愛你》嘅全球首映，吸引咗唔少fans捧場，比起凱莉個簽名會墟冚得多。