吳文忻日前與圈外男友同往泰國布吉旅行，男友預備鮮花和蛋糕，與她在餐廳撐枱腳賞日落，浪漫地慶祝文忻三十歲生日，令甜在心頭的她深感今次是透支蜜月。
吳文忻日前與圈外男友及一對男女友人，同往泰國布吉旅遊，他們在當地逗留五天，穿上比堅尼泳衣盡情享受陽光與海灘，盡情吃喝玩樂，結果增磅而回，又長滿雀斑。
吳文忻本月十七日三十歲生日，所以男友於當地特別安排一幕浪漫場面，為她慶祝，令吳文忻甜到入心。日前吳文忻在中環接受訪問時說：「嗰日男朋友特登喺酒店訂蛋糕，又訂咗一紮白色玫瑰，我哋去到一間喺山頂嘅露天餐廳食飯，一路睇住日落，食食吓飯佢突然拎咗啲花同蛋糕出嚟，畀個驚喜我。」
吳文忻回想當日場面又忍不住笑說：「雖然個蛋糕都幾難食，紮花又整到成個花牌咁，但係我都覺得好sweet。」問她此行是否預支蜜月？她即笑說：「次次去旅行都話預支蜜月，我諗係透支啦。」
除遊布吉外，吳文忻與男友曾到PP島玩浮潛，但她在餵魚時卻被啄至指頭受傷，她說：「為防禽流感，特登唔食雞，但唔記得防蚊，有日去做Spa，俾蚊係咁叮。我又不停食，係咁曬，之前咁努力減肥，做彩光，一次旅行就脂肪、雀斑返晒嚟，但冇法，因為我真係鍾意陽光與海灘。」
此外，吳文忻自與M8公司約滿後，揚言工作比前更多，她說：「啲人知道以前我有經理人唔敢打畀我，唔知點解喎，𠵱家啲人反而會主動打畀我，我啲工作都排到明年二月。」
採訪：朱倬誼
