星爺最近有句話，大意如此：「當遇上人生低潮的時候，愛情係最佳嘅支持。」呢句說話甚有道理，亦冧死女。十月份可算水貨大亨袁仁祥一生中最黑暗嘅月份，聽祥哥講今個月喺日本遇上不少天災人禍，先講佢喺新宿Vintage酒店住開間豪華套房，個廁所竟然塞咗，風筒又壞埋，令佢非常氣憤。更不幸係月頭遇上日本史上狂風，月中寄貨行李又遇上車禍，月尾重遇上地震；彷彿命運之神要趕喺十月之前玩謝祥哥為止！種種不幸事件，搞到祥哥入貨成本大增，好多正貨都攞唔到。
行內傳聞，早兩個禮拜日本BusyWorkshop由Skatething設計最正嗰件鯊魚衞衣，祥哥就走寶入唔到貨，被「潮特陳果」（前『先達陳果』）搶先一步，返香港贏咗幾條街。行內更傳佢本來有意喺朗豪坊開舖，可惜未能成事，一直耿耿於懷，有日佢就放棄一身裏原衣裝，換上杜汶澤式嘅嘻哈裝扮，化身時下潮人竄入旺角「潮特」，一探其他水貨舖行情，點知被人家老闆捉個正着，當場識穿，場面異常尷尬。失落的一代水貨大亨，慶幸還有同樣一身香港式嘻哈打扮嘅祥嫂支持，手握手共度這個黑色十月。
主持人：大食Jack
八卦熱報：