讀者鬧左丁山，話畢業生人工只得八千，還學費貸款好辛苦。請諗清楚，如果真係加學費，照李國章局長講，係二○一一年大學四年制開始時之事，七年之後噃。畢業生月薪八千，似乎係今年之事，唔通七年後又係月薪八千？除非有另外一個董建華做特首啦，講唔通。此外，第一年月薪八千啫，之後有冇人工加呀？過去七年就冇嘞，希望二○一一年之後唔會有同樣事件發生；否則香港由一九九七至二○一一，共十四年，都係原地踏步，我哋重有乜希望？移民上海好過啦，大家唔使咁悲觀啩？
大學增加學費，並非新鮮，每次增加，反對派嘅論點都係一樣，中外相同。呢啲論點包括：（一）加學費，窮人負擔唔起，加學費會加速貧富懸殊，只有有錢仔先讀到大學；（二）窮家子弟入大學，負債纍纍，一世還唔清。
英國今年講增加學費，學生大罵貝里雅，就係揸住上述兩點，法國德國大學生反對加學費，論點相同。美國啲大學生較少反對加學費，因為佢哋自小就學曉派報紙、洗車嚟賺零用錢，入到大學就捧餐、兼職，一方面借政府錢，申請獎學金。民主黨副總統候選人愛德華茲嘅父親係紡織工人，美國紡織業受亞洲進口貨打擊，愛德華茲之父後來失業，佢自己就係靠半工讀完成學業。
唔講美國，講番香港，四十年來大學學費由每年八百元加至四萬二千元，是否窮家仔女入唔到大學？當然唔係，今天在香港讀大學嘅學生，大部份住在廉租屋，與三十幾年前嘅中文大學相同（香港大學就較多富家子）。七年後增加學費，大家使乜咁快怕定先吖。