期指結算，好友趁油價大幅回落兼有資金流入的利好消息，將恒指推高至13113收市，升274點。近日空軍雲集的滙控（005），噚日一度升至126.50元，據聞淡友開始有怯意，若果加快平淡倉，大市可能重有得去。
港府連日表明話土地供應充足，只等發展商勾地而已，長實（001）及新地（016）升逾3%；而大嶼山概念股香港興業（480）亦升逾3%，查老闆好應該多謝唐唐的發展大計。不過，大嶼山幾乎是香港的最後一幅尚未開發寶地，港府要發展呢幅地，相信會引來唔少環保團體反對，就連阿虎都唔贊成開發，集中資源重建舊區好過啦。
中國燃氣（384）轉型為燃氣股後，頻頻在國內簽訂燃氣項目，最近又在滄州組成合資燃氣公司。要投資當然要錢，摩根大通分析員見完中國燃氣管理層後，出報告話公司配股集資機會大，重話股價可能會因此而出現壓力，叫投資者待中國燃氣調整後才考慮買進。不過，中國燃氣噚日仍隨大市上升，收報1.01元，升9.78%。黑客話，公司通常都係趁股價急升後才配股，好少在調整後才配股，至於配完股之後有冇得炒，就好視乎接貨者的實力，幾時才抵買實在好難講。中國燃氣成交不俗，高達1億元，應該就快有動作跟尾。
麗星（678）噚日復牌，證實正洽商旅遊業務合作機會，但就冇講明會否涉及澳門賭業，股價再踢高7.5%至2.15元收市。最近又有消息話何太子將親身前赴星洲，唔知係咪同麗星有關呢？
阿虎