業內人士話住宅樓花炒風熾熱，但其實個別二手都炒得火紅火綠，屯門細價上車盤就係最佳例子。
居屋澤豐花園，有炒家沽貨後再度入市，先以六十八萬賣出四座中層五百三十呎A，賺咗十五萬，跟手入番件五座低層B，五百二十呎，只係五十六萬，每呎千一。
至於同區居屋悅湖山莊，則有炒家以九十二萬沽出七座中層J，執近二十萬。
祥益營業副董事張才權指出，屯門住宅價平，入場費低，所以成為炒家樂園，估計未來炒風仍會熾熱。
佢補充，呢啲自由市場成交居屋，炒家好多都係低價買入殘舊單位，裝修後再賣，由於上車客資金唔多，所以肯買呢類貨，用九成半按揭上車。
澤豐花園放售單位，一成係炒家貨，約有七個；而悅湖山莊就佔一成半，約八至十個炒家盤。
住宅樓花炒風勁，炒家買入單位，梗係想盡快摸出賺錢，所以會以唔同方式出貨，近期多咗用拍賣呢招。
好似日進測量行今日拍賣會，就有件摸貨，係新鮮熱辣嘅牛池灣清水灣道8號二十樓A，九百七十呎，開價四百五十萬。
該行下月十一日舉行拍賣會，有個屯門聚康山莊二座七樓G摸貨，五百九十呎，開價一百三十八萬。
當日拍賣四項物業，蘭西發現有個係接咗摸貨，完成交易後再攞出嚟拍，屯門大興花園二期二座二樓F，五百八十呎，九月八日成交價九十二萬，上手炒家持貨十三日摸出，賺咗十三萬。
業內人士話，炒家將單位交畀拍賣行，拍賣行會幫佢做多啲宣傳，加強市場注意，所以摸貨用拍賣方式出貨有增加趨勢。
樓市好景，交投活躍，單位一年轉幾次手例子增多，鰂魚涌太古城景天閣低層七百呎A，九個月轉手三趟，累積升幅三成二。
單位一月以近二百五十萬成交，二月以逾二百八十萬摸出，賺三十四萬，今個月再度易手，作價近三百三十萬，執四十六萬，最新嗰名買家諗住自用，短期內應該唔會有第四次易手。
美記曾令村話，呢個盤可以轉幾次，原因係有泳池及內園景。
今個月，太古城有八十宗買賣，呎價三千至六千四。
貨尾盤要催谷銷情，除咗增加優惠，委託代理，做獨家都係其中一招，可以令經紀集中精力賣一個盤。
今個禮拜將軍澳掀起獨家潮，有三個盤先後委託三間代理行做獨家。繼將軍澳廣場及怡心園，分別畀咗美記同中記做獨家，利記都唔執輸，攞咗將軍澳中心代理權。
利記徐志華話，將中得番四十幾件貨，呎價三千零，高中低層都有，主要分布第一、二及十二座。兩房最平唔使二百萬，三房入場費近三百萬。
佐敦普慶廣場對面金勳大廈「數碼講」商場，主打售賣時尚潮流數碼資訊科技產品。
為咗引起市場注意，今日起一連三日，辦資訊科技滙演，同場有慈善拍賣，善款捐畀聯合國兒童基金會，及香港殘疾人士慈善團體「動力學堂」。
商場宣傳招數𠵱家層出不窮。
中記翁敬達話，個場兩萬呎唔到，分三層，總共有一百一十二個舖位，九十至三百呎，呎租四十至一百蚊。
中原老闆施永青分析地產市道聽唔少，點知講其他都幾有趣。有線娛樂台訪問佢，搵嚟玄學家楊天命同佢批命。
楊天命話，施老闆四十三歲開始行十年退休運，五十二歲後十年，財運過旺，有利拍檔賺錢。之後行權運，即係可能到六十幾歲，重要繼續指點公司運作，或者從政。施老透露，的確有人同佢傾過從政，不過太太反對。
蘭西問過中原人，知道佢老人家今年五十五歲。
雖然得玄學家指點，但施老闆話唔信算命，重笑言對自己命運一清二楚，就係「死路一條」，因為將來一定會離世。
楊天命重笑言，施老十分旺桃花，不過，桃花多而不濫，為人好浪漫咁話，總之懂得尊重女性。
電郵地址：
