呢排香港電影市道可以話係一片死寂，咁多間電影公司加埋開嘅戲都唔夠十部，認真慘情，個市咁差，主要係因為最近內地對港片諸多限制，大家都知𠵱家嘅港片好依賴內地市場，冇咗內地資金投資，影響又點會唔大，所以幾間較多產嘅電影公司如中國星、寰亞同寰宇除咗拍緊嘅賀歲片外，開戲計劃全部擱置咗。
而由英皇電影投資，成龍同金喜善主演嘅《神話》更大cut一半製作費，之前製作成本話要一億二千萬，咁𠵱家即係cut到剩番六千萬，呢筆預算重未計成龍嘅六百萬美金（約四千六百八十萬港元）片酬，英皇要閂水喉亦好正常，因為《千機變Ⅱ花都大戰》拍得咁貴又唔係收得好勁，而《新警察故事》嘅製作費又超貴，當然冇乜肉食，喺咁嘅情況下，英皇冇法子唔縮皮。
鄭希怡（Yumiko）噚日出席新城嘅新人巡禮活動，佢以過來人身份支持一班新人，Yumiko話今年特別多女新人，感覺熱鬧更好玩，佢話：「我最睇好梁洛施，佢各方面都表現好好，而薛凱琪又係好多男仔嘅夢中情人，係梁洛施嘅勁敵。」
陳法蓉（Monica）噚日三十八歲牛一，仍然單身嘅佢前晚就同成班朋友包括洪欣同囝囝、洪欣男友郭力行、毛舜筠同張堅庭夫婦等，一齊去咗蔡少芬嘅畢架山寓所慶祝生日，佢哋喺凌晨十二點開完派對，Monica拎住大袋物品離開，相信佢一定收咗唔少禮物。
阮兆輝製作公司噚日被追討欠稅，話佢至今仍未繳付公司利得稅，稅務局噚日入稟區域法院，向該公司追討有關稅項。
原訴人係稅務局局長，被告人係阮兆輝製作有限公司，入稟狀指○○年至○一年，被告人嘅利得稅最後評稅為三萬三千六百元，今年八月十六日為繳款日期，但被告人至今仍未繳交。
案件編號：DCTC11336/2004
