「麥當娜」今日會乘搭國泰航機由北京來港，然後去南非撒野……大家唔好咁亢奮住，呢件「娜妹」唔同嗰件唱歌唱到出晒位嘅名歌星麥當娜，而係來自上海動物園嘅六個月大老虎女「娜妹」。
由中、英、南非合作嘅「拯救中國虎」計劃，國泰航空繼上年成功由內地空運兩隻幼虎去南非之後，今年再接再厲，又幫手空運兩隻小老虎去南非，協助老虎適應野外生活。呢兩隻老虎一仔一女，男嘅叫「虎伍茨」，即係一流高球手「老虎仔」Woods嘅普通話譯音，另一隻叫「麥當娜」。
「拯救中國虎」計劃係想幫瀕臨絕種嘅華南虎回歸自然，無論動物園點樣保護同繁殖華南虎，始終都係人工品種，為咗地球上再次出現真正嘅野生華南虎，科學家就想出訓練幼虎重新學習大自然嘅謀生技能，等佢哋學成歸來，就「放虎歸山」，而最理想嘅再培訓學校就係喺南非，預計二○○八年就會有第一批老虎畢業回國。
傳真︰2623-9278
電郵︰