格拉曼歷、烈達、塔拉戈納競技等等，都係大家好少聽到嘅西班牙球會；但佢哋周三晚就威過威士忌，因為喺西班牙盃第一圈比賽中，分別將巴塞隆拿、華倫西亞及衞冕冠軍薩拉戈薩踢咗出局，做咗「巨人殺手」！
其實睇番出場名單，巴塞隆拿同埋華倫西亞都只係派出副選應戰，我求大俠覺得咁都無可厚非，話晒兩隊都係今季聯賽及歐冠盃爭標分子，早啲喺呢項賽事下馬，更能專心於兩大目標作戰。不過衞冕嘅薩拉戈薩就用上頗完整陣容出擊，怕且想重溫上季捧盃好夢，但結果輸波出局，好在足智彩冇開盤，唔係又輸死人！
前晚萊切同國際米蘭合演咗一場快打快嘅鬥攻比賽，萊切能夠搶到一分本來已經唔錯，估唔到教練施文賽後鬧班球員臨尾採取放棄態度，無貫徹佢進攻戰略。我求大俠有睇足場波，覺得萊切班球員全場都好搏，到尾「莫」晒舉步為艱。唔知呢番話係姿態，定施文要求過高嘞。
巴西老牌勁旅法林明高缺財，搞到戰績好差，徘徊喺榜尾位置，貴為球會一代象徵人物嘅薛高終於忍唔住，炮轟班球員作戰態度差，衰到護級真離譜。球會主席聞言後，即刻引述畀球員，刺激球員鬥心。據報唔少球員聽完都話肯發奮。即管睇吓薛高訓話有無實際效用啦。
保頓前晚對熱刺場聯賽盃賽事發生一件意外，早前先加盟保頓嘅法迪加，熱身時突然暈低，搞到要即時送去醫院，職球員都大為緊張。之後，經過一輪觀察後，證實無大礙。法迪加效力國米時都試過練波時暈咗，保頓領隊艾拿迪斯今次想再選法迪加，真係要一段長時間先得囉！
塞內加爾中場戴奧喺周二晚聯賽盃為利物浦入波後，對傳媒話如果聖誕前仍冇正選踢，就會喺一月離隊。我求大俠覺得佢咪以為入咗波，幫球隊晉級就好大功勞咁，淨係要喺謝拉特同阿朗素兩人手上爭個正選位已經難，唔想好似佢同鄉迪奧夫咁樣黯然離隊，都係出少句聲好啲。