將會喺下周日舉行嘅「香港步步創高峰——決戰國金慈善跑」，噚日喺會展搞咗個抽籤儀式，為每一隊參賽隊伍安排兩名藝人同隊，好似由賭王個仔何猷龍揸fit嘅新濠隊就抽中近期人氣反彈嘅鄭伊健同無綫姐仔郭羨妮，四叔李兆基支恒地隊就抽中無綫力捧新人黃宗澤同埋阿叻。
身為活動主要贊助人嘅渣打銀行個隊就犀利啦，佢哋抽到近期有戲上緊嘅章小蕙不特止，更抽到經過風風雨雨後仍獲英皇力捧嘅吳浩康；有章小姐跑樓梯，呢個慈善活動真係大大大大有睇頭得多。據八方所知每隊將會以接力形式跑畢國金嘅八十八層樓，唔知有份跑嘅渣打香港區總裁兼總經理王冬勝，會唔會陪章小姐跑幾層呢！
（圖）如果到時由渣打香港區總裁王冬勝（左二）夥拍章小姐跑樓梯，應該都幾有睇頭！
傳真︰2623-9278
電郵︰