早知一日（三日）事，富貴萬千年。先幾日個市氣息奄奄，以為情況少少不妙，點知恒指就彈升274點畀你睇。呢頭，OPEC有個理事，話油價可見80美元，嗰頭隔晚紐約期油就跌4.91%至52.46美元畀你睇。美股因此彈彈跳，美股彈得勁，外圍跟埋上去，港股想唔上都唔得，咁樣，恒指就上到13113。
滙控C輪：滙控（005）上到126元，升1.50元，直迫上次高位（126.50元），上試04年新高129元，睇嚟冇乜走雞。
滙控升1.50元，啲明年到期嘅C輪（10份兌1股正股），當然冇可能跟足升夠15仙，但跟1半升7、8仙都應該冇乜問題。4440升6.5仙，收50仙。4441升5.5仙，收49仙。4445升3.5仙，收40.5仙，呢隻升得唔夠，短線買得過；昨日升得唔夠，係因為數據冇人哋咁靚，但都有機會跟番大隊上去，隻輪明年6月初到期，溢價3.2%，槓桿率31.1倍，夠晒爆炸力，就算有效槓桿率都有13.3倍，爆炸力都相當爆。正股有氣勢，上多三幾蚊，隻輪分分鐘升多40-50%。
長實C輪：地產股非常掂檔，主角嗰幾隻，隻隻生猛，例如新地C輪2252一彈就係28%、長實（001）升2元，收65元，隨時升多一兩蚊，搵長實C輪短炒，2249係正印之選，明年2月到期，輪價38仙，溢價5.8%，槓桿率17.1倍（有效9.1倍），引伸波幅26.2%。
章盛