民主派最近嘅分歧，搞到李鵬飛好感慨。飛哥形容民主派𠵱家正係「四分五裂、群龍無首、冇晒領導」，而大班鄭經翰就想做領導，但係飛哥覺得佢成日淨係做啲細眉細眼嘅小動作。至於要民主黨出嚟領導民主派，梗係唔掂啦，啲人條氣都唔順楊森，而馬丁又因為年紀問題，睇怕佢做埋呢屆民主黨成員後，都要退休囉！
飛哥又大讚泛聯盟嘅石禮謙，表現好過晒三大黨魁。佢重爆料話，如果同范太爭主席嗰個唔係何俊仁，泛聯盟分分鐘連范太都唔畀面，拉埋佢落馬，好似石禮謙咁夠狠，諗得到就做先至掂，民主黨就完全唔係佢嗰皮。
講起普選，飛哥又再鬧民主派，再爭取○七、○八年雙普選就好似「撼頭埋牆」，唔好再發政治夢，應該全力爭取二○一二年雙普選，唔好擔心俾人話轉軚！飛哥對民主派都算愛之深、責之切。
傳真︰2623-9278
電郵︰