立法會選舉，民主黨失利，負面溫室效應尚未消除。中大民意調查，民主黨民望下跌四巴仙，而親中嘅民建聯，其擁躉雖然係知識水準低下及年齡老邁人士，不過民意支持較上月就狂升咗百分之零點五喎！
雖然，成個泛民主派陣營，包括青少年偶像、有「議會周星馳」之稱嘅長毛，重有粒粒巨星鎮住，計番總分，都會係泛民主派贏晒。但民主黨身為香港歷史最悠久嘅百年老店，一向當正自己係旗艦，係泛民主派呢條四重彩嘅馬膽之選（四重彩就係民主黨、前綫劉慧卿及職工盟、四十五條關注組嘅知識分子幫，同埋長毛、張超雄等城市散兵游擊勢力），若然民主黨力水唔夠，泛民主派就要現實少少，宣布民主黨呢隻馬膽，經已完成歷史任務，以後淪為配腳，而隻馬膽，一係就讓畀卿姐，一係就由長毛揸旗，一係就另闢途徑，搵大班做黨主席，喺民主黨內，書同文、車同軌，建阿房宮，同時清除埋啲秦二世、趙高一類嘅角色，咁泛民主派日後先至可以修築成功一條萬里長城，東自山海關，西至嘉峪關，共同抵抗匈奴蠻族嘅瘋狂進攻。
民主黨不斷有人退黨。除咗張炳良等一早見勢色唔對拉馬脫離，跟住重有第二梯隊不滿，話冇得上位。主席楊森話會撥款百萬培訓第二梯隊（其實第一梯隊又何嘗唔使再培訓）。民主黨某啲人，自從九一年入咗議會，一直冇讀書進修，反為人哋長毛，喺街外一路抬棺材，又一路踎喺街燈底下苦讀馬列主義托洛斯基及法律著作。從政唔讀書，淨係識得出風頭，爭奪喺本報李八方嘅政治八卦版面見報，淨係識得彈埋啲入馬場、去法國飲紅酒嘅公關稿嚟登，信唔信八方帶頭第一個杯葛你民主黨，由即日起在本版拒絕再登載你李華明之類同老婆仔女行山嘅宣傳新聞吖嗱？
真係唔摑唔醒。民主黨再唔振作，搞到屎坑關刀，文（聞）唔得，武又唔掂，泛民主派大把人才，大班、淑女薇、卿姐、長毛，有豹子頭林沖，有一丈青扈三娘，有母大蟲顧大嫂及花和尚魯智深，講英文嘅又有，爛撻撻嘅又有，在全港選民委託之下，信唔信隨時可以另據山頭起過支旗，上演一幕梁山泊火併王倫嘅活劇，另外搵過個宋江出嚟吖嗱？正所謂攘外必先安內，市民給予民主黨整頓改革嘅時間無多嘞，執生喇你班嘢！
傳真︰2623-9278
電郵︰