早話過，個市唔可以睇得太淡，但估唔到，在期指結算當日，就已經大幅抽高270多點。今次，好多人中伏。
油價大幅回落，外圍股市造好，帶動恒指裂口高開，一舉而重上10日線（12992）、20日線（13112）同50日線（12997），且有近177億元的大成交支持，初步形勢已轉危為安。今次形成島嶼回升，本周一低位12743極有可能係中期調整的底部，後市只要站穩在10日線和20日線之上，有力挑戰月初的13403高位。事實上，熱錢正源源流入香港（噚日金管局又接5億美元沽盤），大市一直未能有較大發圍，都係被升唔停嘅油價窒住，家吓油價回落，大市壓力解除，自然一飛沖天。重有，由星期二開始，升降指數明顯轉強，已有啟示。
噚日上升股（不計認股證）近450隻，中信21世紀（241）強勢畢呈，搶上1.91元高收，大升9.7%，成交9370多萬股，再創新高。成交量一般都走在股價之前，21世紀呢個上升大浪，相信重有排升。至於睇幾多，2字頭應該都未係有關人等心目中嘅價錢，到第日再有注資行動，坐3望4亦有可能。
銀建國際（171）整固幾日，又再發力，高收2.85元，係今年2月10日以來新高，成交亦大增到5630多萬股。由2月開始，銀建形成一個大圓底，今次突破頸線阻力，照度上去，中線上升目標指向4.3元。唔排除銀建短期內會出現後抽，但將係最後入貨機會。
首長國際（697）有消息，話短期內會有大動作，噚日高收0.475元，正蓄銳第3次衝關，一破位而上，短期量度上升目標係0.6元。
首國主要經營鋼材製造、發電同航運業務；呢3瓣，都係今年盈利表現突出嘅行業，特別係航運，運費上半年急升後，7、8月間略作調整，跟住又再升過。今年上半年，航運嘅分類業績6148萬元，比去年同期的虧損1528萬元，大有改善；下半年，運費收入應會再有顯著改善。
家吓兩大股東，包括首鋼和長實（001）持股，已超逾7成，唔排除母公司會繼02年重組之後，再安排注資，益多首國一次。以現時首國預測PE仍不足8倍計，後市應該大有作為。
郭兆誠