蘭桂坊六四吧做埋今個月就收檔，社運人士日後又少咗個聚腳點。唔少民主派議員，喺前日立法會辯論完晒後就匆匆忙忙趕去同六四吧送別。馬丁、鄭大班、鄭小班、大嚿同八方講，佢哋以前唔多去六四吧，去咗幾多次幾乎都可以數得出。近日盛傳會組黨嘅鄭大班重特登話，第日唔好又話我同佢哋三個組黨啦！
原來黃毓民一家同長毛一早已經喺度打躉，而馬丁重好似成個細路咁，一上到去又話自己唔飲酒要食雪糕，結果班議員又一齊去咗買雪糕食，然後再返六四吧。
佢哋飲咗冇耐，代表醫學界嘅立法會議員郭家麒同老婆殺到，毓民即刻介紹啲屋企人畀郭醫生認識。毓民睇落幾精神，佢話自己嘅聲帶手術暫時做咗一半，下個月要做埋另一半，到時就冇事啦，至於有乜打算，一係開多兩檔牛肉麵囉！
（圖）前日毓民（右二）個仔單案一審完，佢夜晚即刻落吧玩，果然好嘢。
傳真︰2623-9278
電郵︰