陳豪、周麗淇、米雪和黎耀祥等，昨日於將軍澳電視廣播城為無綫新劇《秀才遇著兵》進行拜神儀式，劇中周麗淇一身好武功，不時吊威吔拍攝。
周麗淇說：「今次真係打到七彩，連吊威吔都要打，有場講我吊住踢兩個人之後，重要擘一字馬。」問她可有經常ＮＧ？她說：「試過ＮＧ十幾次，不過呢啲都係技術上嘅問題，唔關人為事，所以唔會俾人話。」
周麗淇自言首次做打女已受傷，她說：「我因為成日打，所以拉傷大腿韌帶，𠵱家都紮住，着起戲服好熱。」此外，陳豪將與周麗淇有感情戲，他說：「今次我唔使打，演風流才子，係風流而唔係下流。」
採訪、攝影：王崇穎