美股前晚雖大反彈，但港股仍處於窄幅上落局面，恒指收報12838，跌13點，成交125.96億元。市場不明朗因素眾多，恒指未下試250日線其實已算硬淨。
早前信置（083）發行換股債抽水，噚日恒地（012）及恒發（097）又話要各自增設6億股法定股本，以增加發行新股的靈活性，好自然令市場揣測地產股再掀集資浪潮。不過地產股噚日仍然企硬，未有出現沽壓。恒地收報36元，升0.28%，新地（016）升0.35%至70.75元，長實（001）則冇起跌，信置更反彈4.7%。
e莉莎話，恒地要增加法定股本，須在12月6日股東大會上通過才能生效，換言之，恒基系冇可能在短期內進行配股集資，不過就算即刻抽水，市場游資應可承受得住。恒地增法定股本後，配股抽水空間可增至240億元（以每股36元計），足夠作為競投西九龍文藝區項目的本錢，但今次對手係新地、長實加埋法國藝術機構龐比度，據聞呢個組合深得官方重視，看來恒地單靠財力是難以取得該項目發展權。
政府要求兩鐵合併擺明為了減票價，但地鐵作為一間上市公司，董事局的一切決定應以整體股東利益為先。不過，主席錢果豐日前就講到明合併嘅協同效益會百分百用作減低票價。如果係咁，合併兩鐵又對地鐵股東有乜嘢好處呢？實在令作為地鐵股東的阿虎擔心。地鐵噚日收報11.25元，跌0.44%。
麗星郵輪（678）停牌待解釋股價異動原因，該股前日突然抽高至2.60元，其後又回至2元收市，跌1.2%。市場曾經傳出麗星可能與何生合作進軍澳門賭業，及大股東可能會向麗星注資。
阿虎