次次赤柱富豪海灣有銷售新聞，次次富豪國際（078）股價都會有異動，今次又唔例外，噚日富豪大升6.56％，收0.325元，成交股數1.17億股，金額3773.5萬元。
經紀陳話，自從自由行開始同埋地產股復甦之後，富豪的炒作藉口其實冇乜變過。據聞10月富豪旗下酒店生意甚好，加埋賣樓好消息，炒家唔借勢炒作先至奇，但富豪的負債問題始終係一大隱憂，所以次次股價炒上，市場亦同時傳出富豪可能批股集資的消息。
同系世紀城市（355）早前已同銀行講掂數，完成債務重組，坊間近日亦傳出富豪好似亦同銀行講緊數，搞緊重組或者再融資之類的活動，可以減低利息成本，自然對公司有利。
至於世紀城市同百利保（617），經紀陳就話唔敢寄予厚望，原因係世城一旦完成債務重組，實行以股代債嘅話，屆時債權人將會持有好多世城同埋百利保股份。
此外，過往百利保股價有異動時，百利保多數會趁高批股集資，所以想炒起呢兩隻股份實在唔容易。
慕容小初