選舉點票大醜聞,搞到特區變為國際笑柄。立法會要求成立獨立調查委員會,追究胡官責任。在保皇黨極力抗拒、自由黨全線縮骨棄權之下,該項關乎全港市民利益嘅問題,慘遭否決。
點票大混亂,選票太大張、票箱細細個,一睇就知道會滿瀉。呢個政府全無準備工夫,係咁亂質,經已係冇晒常識。最鄙劣嘅行為就係點票時有長達半小時真空期,驅趕候選人代表出場,選舉事務人員竟然使用螺絲批間尺等器具,粗暴撩撥選票,蹂躪票箱,呢啲行為,喺其他民主國家,一早就宣布選舉無效。
林公公重要力撐,話會提交報告,交報告即是自己查自己,有何公信力?沙士咁大鑊,重有居屋短樁問題,都由獨立委員會調查,點解點票醜聞就由內部提交報告?胡國興經此一鑊,公信力早已掃地,由佢啲馬仔去交報告,有幾多真相?
特區政府在選前狂吹噓,話叫市民投「神聖一票」,真係神聖嘅就唔會用啲棍亂咁撩,亂咁插。選舉事務人員係乜嘢質素,究竟係乜嘢程度,定係政府唔夠人手,其實係喺哥連臣角焚化爐抽調工人過嚟兼職?若然唔係,呢隻專業手勢點解咁似揸支火鉗扒撥骨灰搵緊手鈪、金牙嘅嗰一隻嘅?
唔由獨立委員會調查,又點知呢啲人四年後唔搞多鑊?市民嘅選票,唔係骨灰,投票站亦唔係哥連臣角,胡官唔落台,就真係人神共憤咯。
傳真︰2623-9278
電郵︰