女星章小蕙（Teresa）、韓國變性藝人河利秀及日本女星松坂慶子等，昨日一同以性感打扮出席新片《桃色》的宣傳活動，Teresa否認隆胸傳聞，她自言其34C上圍二十年不變，而河利秀及松坂慶子亦異口同聲大讚Teresa的胸部十分自然。
章小蕙、河利秀、松坂慶子及導演楊凡等，昨日在中環宣傳三級電影《桃色》，三位女主角不約而同以性感打扮到場，其中Teresa的低胸裝更露出喱士內衣，自然成為全場焦點，而楊凡亦宣布該片已被荷李活環球電影公司買下版權，明年二月將會在日本公映。
近日有報道指Teresa曾經隆胸，對此她否認說：「我今日冇裝胸作勢，今晚首映打扮都係以舒適為主，我𠵱家唔係真空，我有打底！報道話我隆胸，可能係因為雜誌編輯係男人，佢哋冇着過女性內衣，唔知內衣對女性體形好有幫助，總之我完全係真材實料，二十年不變，上圍都係34C，要唔要度吓？我有軟尺。」
最近Teresa與富商龍長生傳緋聞，有指對方花了二百萬買《桃色》戲票，Teresa說：「咁樣等如造馬，我哋冇造馬，點可以亂寫，至於今晚佢有冇嚟首映，你哋自己睇吓。」
河利秀出席宣傳活動時穿上露背裝，問她會否覺得Teresa曾經隆胸，她透過繙譯說：「我淨係知自己個胸係假，就唔清楚對方啦，不過我覺得佢個胸好自然，未睇過佢除衫，所以唔知道，但我覺得佢個胸好靚。」
松坂慶子在《桃色》中曾與Teresa互摸大玩SM，應觸摸過她的胸部，松坂慶子透過繙譯說：「我冇掂到佢個胸，但望落去好自然，聽講佢拍呢部戲時積極減肥。」那麼松坂慶子會否贊成女士隆胸？她說：「如果係要好有勇氣。」
採訪：馮美茵 攝影：陳慧安
