美股急升，港股早段升過66點後冇嘢睇，埋單反跌13點，好友洩氣。睇落要等埋期指結算同美國總統大選有結果後，先至比較明朗，暫時都係窄幅上落。
中鋁C輪：國企指數升26點，升幅0.6%，最大升幅係中海集運（2866），升4%。中集冇C輪上市，窩輪龍虎榜自然冇佢份。第2大升幅嘅係中鋁（2600），大行出報告話好嘢，收4.725元，升3.8%，結果龍虎榜上，有7件係中鋁C輪，升幅由16%至24%。主角2167收47仙，有59球易手，升幅最大係佢。睇吓張走勢圖，成個山咁，變化急劇。呢件明年1月到期，溢價13.6%，槓桿率10.1倍（有效5.13倍），引伸波幅56.7%，對正股變化反應敏感，吼正股回軟之時，低位撈貨博吓無妨，高位追貨因住過多幾日踏入11月，溢價收縮易輸錢。中鋁有幾隻升幅大嘅C輪，溢價非常高，冇得諗。
中企C輪：國企股份買盤似乎好勁，好多隻有業績支持，如果因此而睇好國企指數，揀中企指數C輪玩短線，有兩隻可以諗吓，就係2139同9962。
2139年底到期，輪價13.1仙，溢價3.7%，槓桿率12.7倍（有效8.1倍），引伸波幅34.7%，隻輪交投旺，易買賣。9962數據都唔錯，亦係年底到期，輪價20仙，溢價2.9%，槓桿率7.2倍（有效5.4倍），引伸波幅46.1%，交投唔多，唔似得2139贏輸計數都快好多。
建滔公司輪：建滔（148）近期動作多多，收16.50元，再升4.8%。公司輪150收3.45元，升16%，打入龍虎榜。隻輪06年底到期，雖然非常長壽，但溢價42.1%，而槓桿率只係4.8倍，值博率唔高。
章盛