一手樓盤炒風盛，摸貨多到數都數唔晒，熱賣嘅西灣河嘉亨灣，最近重有宗摸上摸成交㖭，賺得重多過第一手摸出。
呢個五座中層G單位，面積六百七十四呎，七月尾以二百八十八萬九千元一手購入，唔夠一月就以三百一十五萬摸出，執到二十六萬一千蚊。點知接手嗰個炒家，今個月成功以三百五十八萬再摸出，兩個零月賺四十三萬，幅度重大過之前一手。單位累積升幅達兩成四。
除咗嘉亨灣外，蘭西記得有摸上摸嘅一手盤，包括薄扶林貝沙灣，同荃灣朗逸峯。
拆細商場出售潮近期再現，繼大鴻輝拆售的葵涌廣場「時尚坊」火速賣清舖位後，另一個位於灣仔嘅「國泰88」商場，噚日搞內購，兩粒鐘賣晒一百六十六個舖，估唔到連外籍客都入市。
代理美聯工商舖行政總裁黃子華話，唔少投資者買入超過一個舖位，最多一個買咗十幾間，動用資金二千幾萬。而一個由住宅部帶嚟嘅外籍客，就用二百萬買咗兩個舖，計劃收租。
灣仔道一二五號「國泰88」商場，地下至三樓共一萬七千呎，舖位面積六十五至二百幾呎，售價四十五萬至三百七十五萬。
高緯物業報告表示，銅鑼灣舖位租金，喺全球最貴租值排名榜位列季軍，同舊年一樣，而喺亞洲就排第一，每呎月租三百七十蚊。第一位就係冧莊嘅美國紐約第五街，呎租六百一十八蚊；亞軍係法國巴黎，每呎月租四百六十二蚊。
高緯話銅鑼灣係人流量極高嘅區域，加上港人消費信心恢復，同埋自由行帶動，令租金從沙士低潮急速反彈，升幅係全亞洲之冠，幅度達五十四巴仙。
呢個報告係由全球五十四個國家、二百二十九個購物區收集租金數據得出嚟嘅。
近期過億交易頻密，土地註冊處最新登記一宗係旺角朗豪坊對面嘅寶生銀行大廈全幢，成交價億六。
蘭西記得恒和珠寶陳聖澤舊年以一億買咗呢幢大廈，之後朗豪坊附近密密有成交，價錢一浪高於一浪，今次最新登記成交價較舊年高六成。
不過，跑開旺角區嘅經紀似乎唔多洞悉呢單交易嘅底蘊，只係有人話個盤放緊兩億幾。
大量買貨一般都會有折扣，買樓都唔例外，但通常只限有實力嘅投資者，散戶只有望門興歎；不過，𠵱家就可以嘞。
喺英國成立已經超過三年嘅PropertyBuyingClub，以會員制方式，集合一班想買同一個盤嘅買家，然後代表佢哋同業主講價，以優惠價錢買樓。公司暫時只係投資英國倫敦以外地區如利物浦及西班牙兩個國家嘅樓。
該會喺本港開設分公司已經超過一年，香港辦事處地區董事富安康話，通常可以獲得市價一成半折扣，扣除開支，會員每次投資，大約可以賺到二十八萬。𠵱家優惠本港會員，連樓花都可以買，首期只係樓價七點五巴仙。
香港會員入會費兩萬五，年費一萬，會員若在一年內都冇買樓，可以獲退還入會費。
電郵地址：
